Հունիսի 22-ին Իտալիայում Հայաստանի դեսպան Ռուբեն Կարապետյանը հանդիպում ունեցավ Իտալիայի խորհրդարանի պատգամավորների պալատի նախագահ Ջիանֆրանկո Ֆինիի հետ:
Հանդիպման ընթացքում քննարկվեցին երկկողմ հարաբերությունների խորացման, խորհրդարանական դիվանագիտության ակտիվացման, հայ-իտալական առնչությունների հարուստ պատմության հանրայնացման հետ կապված մի շարք հարցեր: Երկուստեք կարեւորվեց համագործակցության մակարդակի բարձրացումը ներդրումային եւ մշակութային խոշոր ծրագրերի, ինչպես նաեւ փոխայցելությունների իրականացմամբ:
Այնուհետեւ դեսպան Ռուբեն Կարապետյանը ներկայացրեց ԼՂ հիմնախնդրի ներկայիս իրավիճակը` մանրամասն անդրադարձ կատարելով ադրբեջանական վերջին հարձակմանը:
Ջիանֆրանկո Ֆինին իր հերթին նշեց Իտալիայի հավասարակշիռ մոտեցումը հիմնախնդրի նկատմամբ` ընդգծելով «խորհրդային ծանր ժառանգության» փաստն ու հայկական կողմի խոհեմ եւ հետեւողական քաղաքականությունը արցախյան հիմնախնդրի կարգավորման ուղղությամբ: Պատգամավորների պալատի նախագահը բարձր գնահատեց հայկական դիվանագիտությունը, որին հաջողվել է «Հայաստանի համար առավել շահեկան դիրք եւ վստահելի գործընկերոջ համբավ ապահովել միջազգային ասպարեզում»:
Հայաստանի դեսպանը վերահաստատեց Ջիանֆրանկո Ֆինիին Հայաստան ացելելու հրավերը` հույս հայտնելով, որ այն զգալի խթան կհանդիսանա հարաբերությունների զարգացման համար, հաղորդում է ՀՀ ԱԳՆ մամլո ծառայությունը: