Հիլարի Քլինթոնի հայտարարությունն, որ արվեց Էդվարդ Նալբանդյանի հետ ճեպազրույցի ժամանակ, այն մասին, որ ղարաբաղյան խնդիրը պետք է լուծվի ԼՂՀ, Հայաստանի ու Ադրբեջանի ժողովրդների կարծիքի հիման վրա, դեռևս չի նշանակում, որ ԱՄՆ-ն համաձայն է վերադարձնել ԼՂՀ-ին բանակցային գործընթաց, քանի որ դրան կտրականապես դեմ է Ադրբեջանը: Այս մասին այսօր Երևանում լրագրողներին է հայտարարել Կովկասի ինստիտուտի տնօրեն Ալեքսանդր Իսկանդարյանը: Ըստ նրա, Քլինթոնի վերոնշյալ հայտարարությունը վկայում է այն մասին, որ ԱՄՆ-ն համաձայն է մադրիդյան սկզբունքներին, այսինքն, ղարաբաղյան հակամարտության կարգավորման գործում հարկավոր է հաշվի առնել Լեռնային Ղարաբաղի ժողովրդի կարծիքը, քանի որ հիմնարար սկզբունքներում դրույթ կա ԼՂՀ ժողովրդի կամքի արտահայտության մասին:
Ալեքսանդր Իսկանդարյանը նշեց նաև, որ ընթացիկ տարում լուրջ առաջընթաց չի լինի ղարաբաղյան կարգավորման գործում, քանի որ կողմերի դիրքորոշումները խնդրի կարգավորման վերաբերյալ անհամատեղելի են: Պատասխանելով լրագրողների այն հարցին, թե կարող են արդյոք ապագայում Լեռնային Ղարաբաղում տեղակայվել ՆԱՏՕ-ի խաղաղապահ ուժերը, Իսկանդարյանը կտրականապես մերժեց նման հեռանկարը:
