ԼՂՀ «Զոհված ազատամարտիկների թանգարանում տեղի ունեցավ «ԼՂՀ-ի ազգային-ազատագրական շարժումը, 1988-2009թթ» գրքի շնորհանդեսը, որը կազմել է ԼՂՀ զոհված զինվորների հարազատների միության նախագահ Գալյա Առուստամյանը:
Ներկայացնելով գիրքը՝ պատմական գիտությունների թեկնածու, բանակային «Մարտիկ» թերթի աշխատակից Մհեր Հարությունյանը նշեց, որ գիրքը բազմամյա քրտնաջան աշխատանքի արդյունք է: «Կարծում եմ, այդ գիրքը լավագույն հուշարձանն է մեր բոլոր զոհվածներին, լավագույն օրագիրն է Արցախի ազատագրական պատերազմի մասին: Մեր այսօրվա բանակը հավատարիմ է ավագ սերնդի պատգամներին և վճռական է նրանց գործն ավարտին հասցնելու համար»,-ասել է պատմաբանը:
«Մենք միամիտ էինք, շատ միամիտ: Չէինք պատկերացնում, որ Ադրբեջանը մեզ պատերազմի մեջ կներքաշի: Մենք տեսանք բռնագաղթ, ռմբակոծություններ, լայնածավալ հարձակումներ: Մենք հասկացանք, որ Արցախի ճակատագիրը մեր ձեռքում է: Դա մեր հայկական պատմության բացառիկ էջերից մեկն է»,-ասել է Գալյա Առուստամյանը:
«ԼՂՀ-ի ազգային-ազատագրական շարժումը, 1988-2009թթ» գրքի տպաքանակը 5 հազար նմուշ է, այն հրատարակվել է հայերեն լեզվով: Շնորհանդեսի մասնակիցները նշեցին այն այլ լեզուներով թարգմանելու անհրաժեշտությունը, հաղորդում է miasin.ru-ն:
