ՌԴ նախագահ Դմիտրի Մեդվեդևը շնորհավորել է Ռուսաստանի հայերի միությանը հիմնադրման 10-ամյակի կապակցությամբ և նշել է, որ հայ համայնքը ակտիվորեն մասնակցում է ՌԴ տնտեսության հզորացմանը, սոցիալական կյանքին ու հանրության արդիականացմանը:
«Ռուս և հայ ժողովրդները դարեր շարունակ կապված են եղել փոխադարձ հարգանքի վրա հիմնված անկեղծ բարեկամությամբ ու համակրանքով: Բարիդրացիության և սերտ համագործակցության ավանդույթները փոխանցվել են սերունդներին և նպաստել են մշակույթների փոխհարստացմանը: Իսկ հարյուր հազարավոր հայերի համար, որոնց թվում բազմաթիվ են ականավոր մարդիկ, Ռուսաստանը իրապես երկրորդ հայրենիք է դարձել»,-ասվում է ՌԴ նախագահի շնորհավորական ուղերձում, հաղորդում է «ՌԻԱ Նովոստի» գործակալությունը:
ՌԴ նախագահը նշել է նաև, որ հայ հանրության ներկայացուցիչները Ռուսաստանում շատ բան են անում ազգամիջյան, միջկրոնական և մշակութային բազմազանության և համաձայնության պահպանման համար:
Նոյեմբերի 17-ին Մոսկվայում տեղի կունենա Հայաստանի ու Ռուսաստանի նախագահներ Սերժ Սարգսյանի ու Դմիտրի Մեդվեդևի հանդիպումը:
