Հայաստանի կառավարական պատվիրակության Սանկտ Պետերբուրգ այցելության շրջանակներում վարչապետ Տիգրան Սարգսյանն այցելել է Սանկտ Պետերբուրգի էկոնոմիկայի և ֆինանսների ինստիտուտ, որտեղ նա ժամանակին ուսանել է: Ինչպես հաղորդում է PanARMENIAN.Net-ի թղթակիցը Ռուսաստանի հյուսիսային մայրաքաղաքից, վարչապետը ինստիտուտի ռեկտոր Իգոր Մակսիմցևին է նվիրել երկու գիրք՝ «Փոխարժեքի դերը դրամավարկային քաղաքականության մեջ» և «Հայ մունոմենտալ արվեստը»: Նա նաև գրառում է կատարել պատվավոր այցելուների մատյանում. «Ես այստեղ եմ անցկացրել իմ կյանքի ամենաերջանիկ օրերը: Դա առանձնահատուկ մի շրջան էր, երբ ինձ շրջապատում էին առանձնահատուկ մարդիկ, որոնք նախանշեցին իմ կյանքի ուղին: Ցանկանում եմ, որ բոլոր ուսանողները հպարտանան ինստիտուտով այնպես, ինչպես ես եմ հպարտանում, և միշտ ձգտեն հասնել նորին: Դրա համար այստեղ տալիս են ամենակարևորը՝ մտածելու կարողությունը»:

Ռեկտոր Իգոր Մակսիմցևը Տիգրան Սարգսյանին է հանձնել Սանկտ Պետերբուրգի էկոնոմիկայի և ֆինանսների ինստիտուտի արծաթե մեդալը: «Մենք շատ ուրախ ենք, որ մեր հայտնի շրջանավարտները այցելում են մեր ինստիտուտ: Մենք շատ ուրախ ենք, որ մեր շրջանավարտը, ուսման և ատենախոսության պաշտպանությունից հետո գլխավորեց ՀՀ Կենտրոնական բանկը, իսկ այժմ ՀՀ վարչապետն է»,-ասել է նա լրագրողների հետ զրույցում:

Ռեկտորը հույս է հայտնել որ Տիգրան Սարգսյանի ղեկավարությամբ ՌԴ և ՀՀ կրթության ոլորտները կաշխատեն ի նպաստ երկու երկրների տնտեսությունների: Վարչապետը շրջայց է կատարել ինստիտուտում և զրուցել է դասախոսների հետ:

Սանկտ Պետերբուրգի էկոնոմիկայի և ֆինանսների ինստիտուտում սովորում է 12 հազար ուսանող, նրանցից 1,5 հազարը ասպիրանտներ են: Ինստիտուտում սովորում են 9 հայ ուսանողներ: