«Թբիլիսի կատարած այցի ժամանակ իմ վրաց գործընկեր Դմիտրի Շաշկինի հետ պայմանավորվածություն ենք ձեռք բերել նոր ուսումնական տարվանից հայոց լեզվի դասաժամերը Վրաստանի հայկական դպրոցներում վերականգնել նախկին ծավալով»,-Երևանում կայացած մամլո ասուլիսում հայտարարել է ՀՀ կրթության ու գիտության նախարար Արմեն Աշոտյանը: Ըստ նրա, եթե 2010թ. հայոց լեզվի դասաժամերի քանակը շաբաթական 5 ժամ էր, ապա այսուհետ կվերականգնվի դասաժամերի նախկին ծավալը՝ 7-8 ժամ: «Ես դա համարում եմ մեծ նվաճում և շնորհակալ եմ իմ վրաց գործընկերոջը այս հարցին արագ արձագանքելու համար»,-ասել է Աշոտյանը: Բացի այդ, Աշոտյանը հայտնել է նաև, որ պայմանավորվածություն է ձեռք բերվել այն մասին, որ հայկական դասագրքերը հրատարակվելուց առաջ կուղարկվեն հայ մասնագետներին՝ խմբագրման ու թարգմանության անճշտությունների շտկման համար:
