Չնայած վիրահայերի կոչերին, Վրաստանի ղեկավարությունը դժվար թե պաշտոնապես ճանաչի Հայոց ցեղասպանությունը` հաշվի առնելով Թուրքիայի և Ադրբեջանի գործոնը: Այդ մասին PanARMENIAN.Net-ի թղթակցին է հայտնել քաղաքագետ Հրանտ Մելիք-Շահնազարյանը:
«Այս տարի միանշանակ դժվար թե կարելի է Հայոց ցեղասպանության ճանաչում ակնկալել Վրաստանի կողմից: Այդ երկիրը մեծ կախվածություն ունի Թուրքիայից և Ադրբեջանից` ինչպես տնտեսական, այնպես էլ քաղաքական առումով, և նրանց ազդեցությունը որոշիչ դեր է խաղում Վրաստանի քաղաքականության մեջ»,- հայտնել է քաղաքագետը:
Բացի դրանից, քաղաքագետը ուշադրություն է դարձրել այն բանին, որ Վրաստանում մոտ 250 հազար ադրբեջանցիներ են բնակվում, որոնց շահերը Վրաստանի խորհրդարանում բավական լավ են ներկայացված:
«Իհարկե, չեմ բացառում, որ ապրիլի 24-ին վիրահայ պատգամավորները պահանջեն, որպեսզի խորհրդարանը լռության րոպեով հարգանքի տուրք մատուցի Հայոց ցեղասպանության զոհերի հիշատակին, սակայն ավելին ակնկալել չարժե»,- ասել է քաղաքագետը:
