Վրաստանի Պաշտպանության նախարարությունը «լիակատար ապուշություն» է համարում Ռուսաստանի Իսլամական հանձնաժողովի նախագահ Հեյդար Ջեմալի հայտարարություններն այն մասին, թե, իբր, Վրաստանը հեղաշրջում է նախապատրաստում Ադրբեջանում: Պաշտպանության նախարարությունը գտնում է, որ «նման անհեթեթ մեղադրանքները մեկնաբանությունների կարիք չունեն», հաղորդում է «ՊիրWելի» լրատվական գործակալությունը:
Վրաստանի Պաշտպանության նախարարության մամլո ծառայության պետ Սալոմե Մախարաձեի խոսքով, «մեղադրանքները բոլորովին չեն համապատասխանում իրականությանը, հետևաբար նախարարությունը դրանք մեկնաբանելու հարկ չի տեսնում»:
Հայտնի ռուսաստանցի քաղաքագետ, Ռուսաստանի Իսլամական հանձնաժողովի նախագահ Հեյդար Ջեմալը հայտնել է, որ Վրաստանը պետական հեղաշրջում է պատրաստում Ադրբեջանում: «Վրաստանի տարածքում ընթանում է Ադրբեջանում պետական հեղաշրջման պատրաստություն, և դրա պատասխանատվությունը դրված է Վրաստանի Ազգային անվտանգության անդամ Գիգա Բոկերիայի վրա»,- ասել է Ջեմալը, գրում է SalamNews-ը:
