Լեռնային Ղարաբաղում մարտական գործողությունների վերսկսման դեպքում ԱՄՆ-ն առանց հապաղելու կմիջամտի և իր խաղաղապահներին կմտցնի հակամարտության գոտի: Ամերիկացիներին դրա համար անհրաժեշտ է ընդամենը մեկուկես-երկու ժամ զորքերն Ադրբեջանից և Վրաստանից մարտական գործողությունների շրջան հասցնելու համար: Այդ մասին PanARMENIAN.Net-ի թղթակցի հետ զրույցում հայտարարել է Սևծովյան և Կասպից տարածաշրջանի քաղաքական և սոցիալական հետազոտությունների ինստիտուտի տնօրեն Վլադիմիր Զախարովը: «Ընդ որում սկզբից դրանք լինելու են միջազգային ուժեր, որոնց շատ արագ կփոխարինեն ամերիկյան ստորաբաժանումները: Դրանք կտեղաբաշխվեն ոչ թե մարտական գործողությունների շրջանում, այլ ղարաբաղյան սահմանի ողջ երկայնքով: Իրանի համար դա մահացու չէ, բայց հարվածը բավական զգայուն կլինի: Այնպես որ Ղարաբաղում ներկա ստատուս քվոյի պաշտպանումը բխում է Իրանի շահերից»,- ասել է ռուս փորձագետ և հավելել, որ բաց է մնում այն հարցը, թե կգնան արդյոք ԱՄՆ զորքերն Իրանի հետ բացահայտ առճակատման:
Վլադիմիր Զախարովը նշել է, որ եթե տարածաշրջանում տեղի ունենան փոփոխություններ, ապա դժվար կլինի կանխագուշակել, թե կոնկրետ երբ դրանք տեղի կունենան: «Ես կարծում եմ, որ խոսքը կգնա մի քանի ամիսների մասին»,- ասել է նա:
