2012 թվականին Հայաստանում կսկսեն բիոմետրիկ անձնագրեր տրամադրել: Ինչպես Երևանում Civilitas հիմնադրամի կողմից կազմակերպված քննարկման ընթացքում հայտնել է Հայաստանի արդարադատության նախարար Հրայր Թովմասյանը, այս կապակցությամբ արդեն ընդունվել է կառավարության որոշումը: «Բիոմետրիկ անձնագրերի տրամադրումը Հայաստան-ԵՄ համագործակցության շրջանակներում նախատեսված քայլերից մեկն է: Այդ գործընթացի վերջնական նպատակը Հայաստանի և Եվրամիության երկրների միջև արտոնագրային ռեժիմի պարզեցումը և ապա վերացումն է: Բիոմետրիկ անձնագրերը պաշտպանվածության առավել բարձր մակարդակ կապահովեն»,- ասել է նախարարը:
Ինչպես ավելի վաղ հաղորդում էր PanARMENIAN.Net գործակալությունը, Հայաստանում բիոմետրիկ անձնագրերի և ID քարտերի արտադրության տենդերին մասնակցում են լեհական PWPW և ֆրանսիական Oberthur ընկերությունները: Կառավարության որոշման համաձայն, Հայաստանի բոլոր 16 և ավելի տարեկան քաղաքացիները պարտավոր կլինեն ID քարտեր և բիոմետրիկ անձնագրեր ունենալ:
