Հայաստանը կարծում է, որ ղարաբաղյան հակամարտության կարգավորման հիմնարար սկզբունքների համաձայնեցման վերաբերյալ առաջխաղացումը հնարավոր է, եթե Ադրբեջանը ետ վերցնի 10 առաջարկները, որոնք կատարել է Կազանի եռակողմ հանդիպման ժամանակ: Այդ մասին Երևանում ՌԴ ԱԳՆ ղեկավարի հետ ճեպազրույցում հայտարարել է Հայաստանի ԱԳ նախարար Էդվարդ Նալբանդյանը` պատասխանելով PanARMENIAN.Net-ի թղթակցի հարցին:
Նա շնորհակալություն է հայտնել ՌԴ նախագահ Դմիտրի Մեդվեդևին հակամարտության հիմնարար սկզբունքների հարցում համաձայնության հանգելուն ուղղված ջանքերի համար:
ՌԴ, Ադրբեջանի և Հայաստանի նախագահների Կազանում կայացած գագաթաժողովն ավարտվեց առանց Լեռնային Ղարաբաղի հակամարտության կարգավորման շուրջ հիմնարար սկզբունքների մասին պայմանավորվածությունների ձեռքբերման: Ինչպես հաղորդում է ՌԻԱ Նովոստին, կողմերն առաջընթաց են արձանագրել այդ նպատակին հասնելու ճանապարհին: «Պետությունների ղեկավարներն արձանագրել են փոխըմբռնման ձեռքբերումն այն հարցերի շուրջ, որոնց լուծումը նպաստում է հիմնարար սկզբունքներին համաձայնելու համար պայմանների ստեղծմանը»,- ասվում է նախագահների հայտարարության մեջ:
Փաստաթղթում ասվում է, որ հանդիպման մասնակիցները դիտարկել են հիմնարար սկզբունքների նախագծի համաձայնեցման նպատակով իրականացվող աշխատանքների ընթացքը:
