Բրիտանական խորհրդի «Հմտություններն աշխատանքում» ծրագրի շրջանակում Երևանի զբոսաշրջության, սպասարկման և սննդի արդյունաբերության հայ-հունական պետական քոլեջը կհամագործակցի Մեծ Բրիտանիայի Քրեյվն քոլեջի հետ։

«Սա չի նշանակում՝ մենք եկել ենք սովորեցնելու։ Մենք եկել ենք սատարելու, աջակցելու, մեր փորձը փոխանցելու, որպեսզի հայ-հունական քոլեջը էլ ավելի մեծ հաջողությունների հասնի ապագայում»,- այսօր լրագրողների հետ հանդիպմանն ասաց ՄԲ Քրեյվն քոլեջի միջազգային ծրագրերի ղեկավար Դեվիդ Լոյվըլինը։ Նա նշեց, որ վերապատրաստումից հետո հայ դասախոսները կկարողանան ուսանողներին կրթել եվրոպական ստանդարտներին համապատասխան։

Քառօրյա այցելության ընթացքում հայ-հունական պետական քոլեջի դասախոսների և սոցիալական գործընկերության մեջ ներգրավված բիզնեսների ներկայացուցիչների համար Քրեյվն քոլեջի մասնագետները անցկացրել են մասնագիտական ունակությունների բարձրացմանն ուղղված դասընթացներ և քննարկել համագործակցության զարգացման հետագա ուղիները։ «Պլանավորում ենք գարնանը նորից գալ Հայաստան՝ տեսնելու, թե որ մասնագիտությունների գծով կարող ենք զարգացնել համագործակցությունը»,- ասաց Լոյվընիլը։ Նա նշեց, որ բավական գոհ է Հայաստաում սպասարկման ոլորտի ներկայիս մակարդակից։

Բրիտանական խորհրդի հայաստանյան գրասենյակի ծրագրերի ղեկավար Նարեկ Թովմասյանն էլ նշեց, որ նպատակը առաջին հերթին բիզնես-կրթություն կապի ամրապնդումն է. «Ուզում ենք պատրաստել այնպիսի մասնագետներ, որոնք անհրաժեշտ են գործատուին»։