Walt Disney ընկերությունը որոշել է եռաչափ (3D) ֆորմատով վերաթողարկել չորս հայտնի և սիրված մուլտֆիլմ։ Այս որոշմանը ընկերությունը հանգել է «Առյուծ Արքա» մուլտֆիլմի 3D ֆորմատով վերաթողարկումից հետո, որի շնորհիվ ընկերությունը շահել էր մոտ 80 միլիոն դոլար։ Այս մասին գրում է Mashable-ը։

Ճիշտ է, 80 միլիոն դոլարը շատ քիչ գումար է` համեմատած Pixar-ի «Up» 3D մուլտֆիլմի շահույթի` 730 միլիոն դոլարի հետ։ Սակայն 80 միլիոն դոլարը մեծ գումար է համեմատած մուլտֆիլմի պատրաստման համար ընկերության փոքր ներդրումների հետ, հատկապես երբ մուլտֆիլմը երկրորդ անգամ էին դիտում շատերը։

Եվ այսպես, Walt Disney-ի նախատեսած եռաչափ ֆորմատով վերաթողարկվող մուլտֆիլմերն են «Գեղեցկուհին և հրեշը» (թողարկման օրը` հունվար 31, 2012), «Նեմոյին որոնելիս» ( սեպտեմբեր 14, 2012), «Հրեշները» (հունվար 18, 2013) և «Փոքրիկ ջրահարսը» (սեպտեմբեր 13, 2013)։

«Մեծ պատմությունները և մեծ հերոսները հավերժ են, և Disney-ը բախտավոր է, որ դրանք երկուսն էլ ունի»,- ասել է Walt Disney-ի նախագահ Ալան Բերգմանը։ «Մենք շատ ոգևորված ենք ամեն տարիքի մեր լսարանին մատուցել ևս մեկ հնարավորություն դիտելու սիրելի մուլտֆիլմերը եռաչափ ֆորմատով, իսկ երիտասարդ սերնդի համար սրանք առաջին անգամ կցուցադրվեն մեծ էկրաններին»,- հավելել է նա։