Հայաստանի հավաքականի հարձակվող Յուրա Մովսիսյանը Իռլանդիայի հետ խաղից հետո նշեց, որ հավքականի տղաների մոտ գերիշխում է հպարտության զգացումը, ոչ թե չարությունը:

«Եթե համեմատելու լինենք այն ինչ կատարվեց իռլանդացիների հետ Փարիզում 2009թ., այժմ նրանց համար ամեն ինչ բարենպաստ դասավորվեց: Սակայն, չեմ ուզում ամեն ինչում մեղադրել մրցավարին: Նա վատ չաշխատեց, սակայն, Բերեզովսկուն կարմիր քարտ ցույց տալուց առաջ, պետք է նկատեր Քոկսի խաղը ձեռքով»,-Մովսիսյանի խոսքերն է մեջբերում irishexaminer.com-ը:

Ըստ հարձակվողի, եթե նրանք 11 հոգով խաղային, կկարողանային ցուցադրել իրենց խաղն ու գոլեր իրացնել. «Սակայն, սա ֆուտբոլ է, ոչինչ չես անի: Մեր երիտասարդ դարպասապահը ևս իրեն գերազանց դրսևորեց: Մեկ տարի առաջ, ոչ ոք չէր մտածի, որ մենք նման դիրք կարող ենք զբաղեցնել: Կարծում եմ, Հայաստանը զբաղեցրեց իր տեղը աշխարհի ֆուտբոլային քարտեզի վրա»: Մովսիսյանը հույս է հայտնել, որ Հայաստանի հավաքականը կկրկնի հաջող ելույթը նաև 2014թ. ընտրական փուլում: «Ես կարող եմ ասել, որ հպարտանում եմ մեր տղաներով»,-ասել է հարձակվողը: