Հոկտեմբերի 21-ին ՀՀ Ազգային ժողովի նախագահ Հովիկ Աբրահամյանն ընդունեց Երևանում անցկացվող համաժողովին մասնակցելու նպատակով Հայաստանում գտնվող Միջազգային եվրոպական շարժման նախագահ Փեթ Քոքսին և նրա գլխավորած պատվիրակությանը` Միջազգային եվրոպական շարժման փոխնախագահ, Բելգիայի պետնախարար Չարլզ-Ֆերդինանդ Նոթոմբին և գլխավոր քարտուղար Դիեգո Պինտոյին:
Ողջունելով հյուրերին` Աժ նախագահը կարևորեց «Խթանելով քաղաքացիական հասարակության դերը հետագա եվրոպական ինտեգրման գործընթացում Արևելյան գործընկերության երկրներում» խորագրով համաժողովի անցկացումը Հայաստանում` արդիական համարելով նրա թեմատիկան: Հովիկ Աբրահամյանը նշեց, որ եվրոպական ընտանիքին ինտեգրվելը Հայաստանի արտաքին քաղաքականության գերակա ուղղություններից է, և համոզմունք հայտնեց, որ երևանյան համաժողովը կխթանի Հայաստանի և եվրոպական կառույցների միջև համագործակցությունը: Աժ նախագահի խոսքով` Հայաստանի իշխանություներն ունեն քաղաքական կամք` անհրաժեշտ բարեփոխումների իրականացման համար:
Միջազգային եվրոպական շարժման նախագահ Փեթ Քոքսը շնորհակալություն հայտնեց ԱԺ նախագահին` համաժողովն Ազգային ժողովում անցկացնելու հնարավորություն ընձեռելու և դրան մասնակցելու համար: Նա նշեց, որ սկսված բարեփոխումներն ավելի են ամրապնդում եվրոպական արժեքների արմատավորման գործընթացը Հայաստանում:
Զրուցակիցներն անդրադարձան նաև տարածաշրջանային խնդիրների:
