Փարիզում ծանրամարտի վարկանիշային աշխարհի առաջնությունում Հայաստանից առաջին մեդալը նվաճեց աշխարհի և Եվրոպայի չեմպիոն, Օլիմպիական խաղերի բրոնզե մեդալակիր Տիգրան Մարտիրոսյանը։

Հայ ծանրորդին մինչև 77կգ քաշային կարգում հաջողվեց «պոկում» վարժությունում 166կգ արդյունքով փոքր բրոնզե մեդալ նվաճել։

«Հրում» վարժությունում Մարտիրոսյանը սկսեց 190 կիլոգրամից, այնուհետև պատվիրեց 200կգ, սակայն նրան չհաջողվեց գլխավերևում պահել ծանրաձողը, ինչպես և 202կգ դեպքում։ Այսպիսով նա իր ելույթ ավարտեց 356կգ երկամարտի արդյունքով՝ զբաղեցնելով 4-րդ տեղը։ Մարտիրոսյանին հաջողվեց վարկանիշային միավորներ վաստակել Հայաստանի հավաքականի համար։

Մինչև 77կգ քաշային կարգում ծանրորդների ելույթներին հետևում էր Հայաստանի Ազգային Օլիմպիական կոմիտեի նախագահ Գագիկ Ծառուկյանը։