Իռլանդիան ԵԱՀԿ-ում իր նախագահության ընթացքում սերտ կապեր կհաստատի Մինսկի խմբի հետ՝ ղարաբաղյան կարգավորման գործում առաջընթացի հասնելու համար: Այդ մասին ասվում է Իռլանդիայի ԱԳ նախարար Իմոն Գիլմորի հայտարարության մեջ, որը ներկայացվել է Վիլնյուսում անցնող ԵԱՀԿ ԱԳՂ ղեկավարների խորհրդի շրջանակներում, հայտնում է PanARMENIAN.Net-ի թղթակիցը Վիլնյուսից:
Իռլանդիան բարձր է գնահատում ԵԱՀԿ ՄԽ աշխատանքը և ԵԱՀԿ-ում իր նախագահության ժամանակ մտադիր է սերտ կապեր հաստատել համանախագահների հետ: Ըստ նրա, ղարաբաղյան հակամարտության լուծման ժամանակ Իռլանդիան կհենվի հակամարտությունների լուծման սեփական փորձի վրա:
Գիլմորը նաև ողջունել է 5+2 ձևաչափով բանակցությունների շարունակությունը Մերձդնեստրի շուրջ, որի առաջին ռաունդը կանցկացվի Վիլնյուսում՝ 6-ամյա ընդմիջումից հետո:
ԵԱՀԿ Վիլնյուսի ԱԳՆԽ ավարտին նախագահությունը կանցնի Իռլանդիային: