Հայաստանի ֆուտբոլի ֆեդերացիայի նախագահ Ռուբեն Հայրապետյանն, ամփոփելով 2011 թվականը, նշեց, որ ազգային հավաքականն անցնող տարում ունեցավ ինչպես բացթողումներ, այնպես էլ նվաճումներ:

«Եվրոպայի առաջնության ընտրական փուլում մեր հավաքականը շատ մոտ էր եզրափակիչ դուրս գալուն, սակայն չստացվեց: Չնայած դրան, մեր թիմը լավ խաղ ցուցադրեց և ուրախացրեց բոլոր երկրպագուներին»,-ասել է Հայրապետյանը:

Հայաստանի հավաքականը կսկսի պատրաստվել 2014թ. աշխարհի առաջնության ընտրական փուլին փետրվարին և ուսումնամարզական հավաք կանցկացնի Կիպրոսում: Մինչ Մալթայի հետ խաղը, որը տեղի կունենա սեպտեմբերի 7-ին, Հայաստանի հավաքականը 4 ընկերական խաղ կանցկացնի: Ըստ ՀՖՖ ղեկավարի, դեռևս վերջնական պայմանավորվածություն չկա և նա չի կարող նշել մրցակիցների անունները:

ԱԱ ընտրական փուլի խաղերի օրացույցի մասին Հայրապետյանն ասել է հետևյալը. «Մենք ստիպված ենք լինելու խաղալ բոլոր մրցակիցների հետ: Սակայն, քանի որ մեր հիմնական դարպասապահ Ռոման Բերեզովսկին որակազրկվել է և բաց է թողնելու այդ խաղը, ավելի լավ է խաղալ Մալթայի, քան Դանիայի կամ Իտալիայի հետ:

Ֆուտբոլի ֆեդերացիայի նախագահը նշել է, որ, հաշվի առնելով հավաքականի լավ ելույթը ԵԱ-2012 խմբային փուլում և ծանոթ լինելով խաղացողների ներուժին, նա կարող է առաջին տեղն ակնկալել խմբում: «Ես միշտ շատ լավ եմ գնահատում մեր հավաքականի շանսերը, սակայն սա ֆուտբոլ է, միշտ չի ստացվում այնպես, ինչպես ցանկանում ես: Սարգիս Հովսեփյանը և մյուս բոլոր խաղացողները հանդես կգան հավաքականում այնքան ժամանակ, քանի դեռ մարզիչը չի որոշել, որ ինչ-որ մեկը չի համապատասխանում թիմին: Իսկ եթե մենք երկարացրել ենք պայմանագիրը Վարդան Մինասյանի հետ, նշանակում է, լավ ենք գնահատում նրա աշխատանքը»,-ասել է Հայրապետյանը:

Նա նաև ասել է, որ Հայաստանի հավաքականում կրկին հանդես կգա դարպասապահ Ապուլա Էդել Բետեն, որը պաշտպանել է հավաքականի դարպասները 2004-2005թթ.«Մեր հիմնական դարպասապահը Բերեզովսկին է, իսկ Բետեն կնստի պահուստայինների նստարանին, եթե անհրաժեշտ լինի, կպաշտպանի դարպասները»:

Հայրապետյանը նշել է, որ Թուրքիայում Հայաստանի հավաքականը ընկերական խաղեր այլևս չի անցկացնի: