Սիրիայում ճգնաժամի կարգավորման վերաբերյալ Դամասկոսի դիրքորոշման մեջ դրական փոփոխություններ են տեղի ունեցել: Այդ մասին Դոհայում Սիրիայի վերաբերյալ ԱՊԼ Հատուկ հանձնաժողովի նիստի բացումից առաջ հայտնել է Արաբական պետությունների լիգայի (ԱՊԼ) գլխավոր քարտուղարի տեղակալ Ահմեդ բեն Հելլին, հաղորդում է ԻՏԱՐ-ՏԱՍՍ-ը:
Նրա խոսքով` սիրիական ղեկավարությունը վերջնականապես համաձայնել է երկրում անկախ դիտորդների տեղակայմանը, որոնք կհետևեն իրադրությանը ԱՊԼ հովանու ներքո:
«Ես սպասում եմ, որ Դամասկոսից ներկայացուցիչ կուղարկեն մոնիթորինգի արձանագրությունը ստորագրելու համար»,- հայտնել է նա:
Նախարարները խորհրդակցության ժամանակ կքննարկեն միջարաբական ընկերության հետագա քայլերը սիրիական կառավարությանը ներքաղաքական ճգնաժամի լուծման ուժային մեթոդներից հրաժարվել համոզելու նպատակով: Հատուկ հանձնաժողովի մեջ մտնում են Ալժիրի, Եգիպտոսի, Քաթարի, Օմանի և Սուդանի ԱԳ նախարարները:
Որպես Սիրիայի և ԱՊԼ միջև միջնորդ հանդես է գալիս Իրաքը: Իրաքցիները փորձում են բանակցությունների սեղանի շուրջ հավաքել իշխանությունների և վարչակարգի հակառակորդների ներկայացուցիչներին:
