Երևանի պետական համալսարանի «Երիտասարդ համալսարանականների միավորում» կազմակերպության նախաձեռնությամբ և Պաշտպանության նախարարության աջակցությամբ կմեկնարկի «Բանակը մենք ենք» միջոցառումների շարքը` նվիրված հայկական բանակի 20-ամյակի:
«Այդ միջոցառումների նպատակն է խրախուսել Հայաստանում ծառայող երիտասարդ համալսարանականներին և հարգանքի տուրք մատուցել Արցախյան պատերազմում հաղթած և զոհված հայ զինվորների հիշատակին»,- հայտնել է հասարակական կազմակերպության ղեկավար Գևորգ Մելքոնյանը:
Նրա խոսքով` առաջին միջոցառման ժամանակ հունվարի 16-ին Եռաբլուրում երիտասարդ համալսարանականները ի հիշատակ զոհված հայորդիների կազմակերպել են մոմավառություն և մոմերով գրել «Բանակը մենք ենք»: Այնուհետև ծրագրվում է այցելել ՀՀ և Արցախի սահմանամերձ զորամասեր, որտեղ կկազմակերպվեն հանդիպումներ զինծառայողների հետ, ինչպես նաև կպարգևատրվեն ժամկետային զինծառայության ընթացքում աչքի ընկած երիտասարդ համալսարանականները: Առաջին զորամասը, որը նրանք մտադիր են այցելել, Իջևանի զորամասն է, իսկ այդ միջոցառումների ավարտը կնշանավորվի երթով դեկտեմբերի վերջին:
