Ընդդիմադիր Հայ ազգային կոնգրեսն ուզում է Հայաստանի Հանրապետական կուսակցության (ՀՀԿ) կողմից ընտրություններում խախտումների դեմ քաղաքական ուժերի միասնական ճակատ ստեղծել: Այդ մասին մամլո ասուլիսում հայտնել է ՀԱԿ-ի համակարգող Լևոն Զուրաբյանը: «Մենք պատրաստ ենք, և մեր քայլերը ցույց են տվել, որ մենք պատրաստ ենք համագործակցել բոլոր հայկական քաղաքական ուժերի, այդ թվում` խորհրդարանական ուժերի` «Ժառանգության», ՀՅ Դաշնակցության, ինչու չէ, նաև «Բարգավաճ Հայաստանի» հետ, որպեսզի ընտրություններում խախտումների դեմ ճակատ ստեղծենք»,- ասել է նա:
Զուրաբյանի խոսքով` ՀՀԿ-ն այժմ զբաղված է միայն մեկ խնդրով` «ինչպես կեղծել ընտրություններն այնպես, որ որքան հնարավոր է քիչ նկատվի»: Այդ կապակցությամբ նա մեկնաբանել է ՀՀԿ և ԲՀԿ միջև հակամարտությունը` հայտնելով, թե «բոլորի համար էլ պարզ է, որ եթե «Բարգավաճ Հայաստանի» և ՀՀԿ միջև տարաձայնությունները շարունակվեն և խորանան, ապա մեր կամքից անկախ կստեղծվեն լուրջ նախադրյալներ, որպեսզի Հայաստանում ընտրություններն իսկապես տեղի ունենան ավելի ազատ, արդար և թափանցիկ»:
