Հայաստանի եւ Ուկրաինայի պաշտպանության նախարարներ Սերժ Սարգսյանը եւ Եվգենի Մարչուկը Կիեւում ստորագրել են 2004 թվականի ռազմական համագործակցության ծրագիր: «ԻՏԱՌ-ՏԱՍՍ» գործակալության հաղորդագրության համաձայն, փաստաթուղթը ենթադրում է պարբերական խորհրդակցությունների անցկացում, տարածաշրջանային անվտանգության շուրջ երկխոսության շարունակում եւ ռազմական պատվիրակությունների փոխադարձ այցելություններ: Փաստաթղթի ստորագրումից հետո կայացած մամլո ասուլիսում երկու երկրների պաշտպանական գերատեսչությունների ղեկավարները նշել են նյութատեխնիկական մատակարարման եւ խաղաղարար գործողություններին մասնակցելու համար ռազմական ստորաբաժանումների նախապատրաստման ոլորտում համագործակցելու Հայաստանի եւ Ուկրաինայի ձգտումը: