Amnesty International իրավապաշտպան կազմակերպությունը հրապարակել է զեկույց` Ադրբեջանում կայանալիք Եվրատեսիլ երգի մրցույթի և դրա հետ կապված մարդու իրավունքների խախտման մասին: «Ադրբեջանը մեծ գումարներ է ծախսում իր փիար-քարոզարշավի վրա` փորձելով ներկայանալ որպես ժամանակակից և պրոգրեսիվ պետություն: Անկախության 20 տարիների ընթացքում Ադրբեջանը չի կարողացել ապահովել իր քաղաքացիների հիմանական ազատությունների մեծ մասը»,-գրում է կազմակերպությունը:

Այդ ճնշումն աննկատ է մնում միջազգային հանրության համար, որի աչքերը, թվում է, ավելի շատ սևեռված են նավթային դոլարների և էներգետիկ անվտանգության վրա:

Կազմակերպությունը ընդգծել է, որ Ադրբեջանի իշխանությունները ճնշում են ժողովրդական դժգոհության նախանշանները: Amnesty International-ը նաև անդրադառնում է ընդդիմադիր և անկախ լրագրողների իրավունքների ոտնահարմանը:

Մասնավորապես ընդգծվում է, որ իրենց աշխատանքային պարտականությունները կատարելիս նրանք հանդիպում են ճնշումների, որոնք խոչընդոտում են մասնագիտական պարտականությունների իրականացմանը:

Ըստ զեկույցի, ժողովրդավարական բարեփոխումների և մարդու իրավունքների ոլորտներում աշխատող մարդիկ, ենթարկվում են ճնշումների և հետապնդումների: Ամփոփելով` իրավապաշտպան կազմակերպությունում գրում են. « Ադրբեջանում տանջանքները և դաժան վարքագիծը շարունակում են մնալ մտահոգության առիթ»: