Հասարակական տրանսպորտի սակագնի բարձրացման հարց ՀՀ տրանսպորտի և կապի նախարարությունում դեռ չի քննարկվել: Այս մասին Ազգային ժողովում լրագրողների հետ ճեպազրույցում ասաց փոխնախարար Հրանտ Բեգլարյանը: «Ես տրանսպորտի փոխնախարար եմ, բայց այդ ոլորտը չեմ համակարգում: Բայց գիտեք, որ տրանսպորտի վառելիքը գազն է»,- ասաց նա: Դիտարկմանը, թե դա ենթադրում է, որ թանկացում է լինելու, նա պատասխանեց. «Ես ասում եմ, որ դեռ չի քննարկվել տրանսպորտի սակագնի հարց: Ես չեմ կարող որևէ ենթադրություններ անել, որովհետև դա իմ ոլորտը չէ»: Փոխնախարարը հայտնեց նաև, որ դեռևս թանկացնելու դիմում էլ չի եղել: Նա նշեց, որ նախ մրցույթի ժամանակ են հայտարարում սակագինը, իսկ մրցույթի իրականացման հիմքում նշված է, որ եթե վառելիքի, պահեստամասի զգալի թանկացում է լինում, ապա կարող է փոխադրողը դիմել և մրցույթային հանձնաժողովը պարտավոր է քննարկել դա: Հրանտ Բեգլարյանն ասաց, որ ինքը տրամադրված չէ, որ տրանսպորտը թանկանալու է: