Հայաստանի ֆուտբոլի հավաքականի «Red Eagles» ֆան ակումբը պատրաստվում է ներկա գտնվել Չեմպիոնների լիգայի «Շախտյոր»-«Յուվենթուս» խաղին:

Ինչպես PanARMENIAN.Net-ի թղթակցի հետ զրույցում նշեց ֆան շարժման ղեկավար Դենիս Սարգսյանը, իրենց հիմնական նպատակն է աջակցել ու քաջալերել հավաքականի և Դոնեցկի «Շախտյորի» կիսապաշտպան Հենրիխ Մխիթարյանին: «Մենք շատ ենք ցանկանում, որպեսզի մեծ աջակցություն ցույց տանք մեր ֆուտբոլիստին, և դա էր պատճառը, որ որոշեցինք հանդես գալ նման նախաձեռնությամբ: Նշեմ, որ խաղի ժամանակ մեր տրիբունայում կբացենք Հայաստանի դրոշը, և նաև անակնկալ ունենք Մխիթարյանի համար»,- նշեց Սարգսյանը:

Ուղևորություն դեպի ուկրաինական Դոնեցկ կտևի 5 օր և կարժենա 400 դոլար: Փաթեթը նախատեսած է 30 հոգու համար, տեղեկացնում է redeagles.am:

«Շախտյոր»-«Յուվենթուս» հանդիպումը կկայանա դեկտեմբերի 5-ին «Դոնբաս Արենա» մարզադաշտում: