Այսօր ՀՀ սփյուռքի նախարար Հրանուշ Հակոբյանն ընդունել է ֆրանսահայ հանրահայտ երգչուհի Ռոզի Արմենին: Այս մասին PanARMENIAN.Net-ը տեղեկանում է նախարարության մամուլի և հասարակայնության հետ կապերի վարչությունից:
«20-րդ դարասկզբի Հայոց Ցեղասպանությունից հետո Ֆրանսիան այն պետությունն էր, որը ջերմորեն ընդունեց բազմաթիվ հայերի: Ֆրանսիայում են կայացել ու հռչակ ձեռք բերել այնպիսի մեծ անհատականություններ, ինչպիսիք են Շառլ Ազնավուրը, Միշել Լեգրանը, Անրի Վերնոն և ուրիշներ: 20-րդ դարի կեսերին նրանց անունների կողքին հայտնվեց նաև Ռոզի Արմենի անունը, ով իր նուրբ ու բացառիկ ձայնով, հմայիչ ու կանացի բեմական կերպարով գերեց ոչ միայն հայերի, այլև օտարների սրտերը», ասել է նախարարը:
Հանդիպման ընթացքում Ռոզի Արմենը պատմել է իր մշակութային գործունեության, անցած ուղու և ունեցած ձեռքբերումների, նշանավոր հայ գործիչների հետ հանդիպումների ու նրանցից քաղած դասերի մասին: Ապրելով ու ստեղծագործելով Ֆրանսիայում՝ Ռոզի Արմենը փորձել է ճանաչել ու պահպանել հայկական ավանդույթները: Նրա ստեղծագործական գործունեության առանցքում եղել է հայ մշակույթը աշխարհին հավուր պատշաճի ներկայացնելու գաղափարը:
Բարձր գնահատելով Ռոզի Արմենի վաստակը Սփյուռքում հայկական երգարվեստը տարածելու գործում, ստեղծագործական և կատարողական բարձր վարպետության և Հայաստան-Սփյուռք գործակցության զարգացմանը նպաստելու համար երգչուհին պարգևատրվել է ՀՀ սփյուռքի նախարարության «Կոմիտաս» մեդալով:
Ռոզի Արմենը նշել է, որ հայ երաժշտության մեծ երախտավորի` Կոմիտասի անունը կրող մեդալը ոգևորիչ է և միևնույն ժամանակ պարտավորեցնող:
