Հայաստանում Շենգենյան գործակցության անդամ երկրների բոլոր հյուպատոսարանները hունիսի 23-ից միանում են Վիզաների տեղեկատվական համակարգին (ՎՏՀ)։ Նոր համակարգով Շենգենյան վիզայի համար դիմողներից կպահանջվի տրամադրել իրենց կենսաչափական տվյալները` մատնահետքեր և թվային լուսանկար, որոնք Շենգենյան վիզայի դիմումում նշված տեղեկատվության հետ կգրանցվեն ՎՏՀ տվյալների կենտրոնացման շտեմարանում:

Հայաստանում Լիտվայի դեսպանատան խորհրդական Դովիլե Սուրվիլաիտենը վստահեցնում է՝ համակարգին միանալով վիզա ստանալու ամբողջ գործընթացը կդյուրացվի:

«Ամեն ինչ ավելի հստակ ու պարզ կլինի, հյուպատոսը ձեր դիմումի համաձայն կնայի նաև ձեր նախորդ տվյալները և հնարավոր է, որ անգամ հարցազրույցի կարիք չլինի», - ասել է նա, մեջբերում է A1plus-ը: Համակարգը կհեշտացնի նաև հյուպատոսների աշխատանքը:

«Ես կնայեմ տվյալ մարդու տվյալները և կտեսնեմ, որ նա արդեն գնացել է, օրինակ՝ Ֆրանսիա, անգամ եթե նա կորցրել է իր նախորդ անձնագիրը կամ փոխել այն»,- ասել է Գերմանիայի հյուպատոս Տերեզա Պորցուցեկը։

Հանձնած կենսաչափական տվյալները պետք է թարմացվեն միայն 5 տարին մեկ անգամ։ Նոր համակարգով մատնահետքեր հանձնելու պարտադիր պահանջից ազատվում են մինչև 12 տարեկան երեխաները, այն անձինք, ումից ֆիզիկապես անհնար է մատնահետք վերցնել, պետությունների ղեկավարներ, ազգային կառավարությունների անդամներ, նրանց ուղեկցող կանայք և ամուսինները, պաշտոնական պատվիրակության անդամներ, երբ նրանք պաշտոնական այցով հրավիրված են ԵՄ անդամ պետությունների կառավարությունների կամ միջազգային կազմակերպությունների կողմից:

Հայաստանի խորհրդարանն 2013-ին վավերացրել է «Հայաստանի Հանրապետության և Եվրոպական միության միջև վիզաների տրամադրումը դյուրացնելու մասին» համաձայնագիրը: Դյուրացված կարգով Շենգենյան վիզա կարող են ստանալ պետական պաշտոնական պատվիրակությունների ներկայացուցիչները, ուսանողները, ԵՄ երկրներում մերձավոր բարեկամներ ունեցողները, կրթական, մշակութային, ակադեմիական, բուժման, գիտական նպատակով ԵՄ այցելողները, լրագրողները, միջազգային սպորտային միջոցառումների մասնակիցներն և այլք: