Հունգարիայի վարչապետ Վիկտոր Օրբանը կոչ է արել եվրոպական երկրների առաջնորդներին փոխել ներգաղթի քաղաքականությունը և ժողովրդին մասնակից դարձնել Եվրոպայի ապագայի մասին բանավեճին, հայտնել է Reuters գործակալությունը:

Եվրահանձնաժողովի ղեկավար Ժան Կլոդ Յունկերը Եվրամիության անդամ երկրների ղեկավարների արտահերթ հանդիպում է հրավիրել հոկտեմբերի 25-ին:, որի ընթացքում կքննարկվի փախստականների հարցը և նրանց հոսքը Եվրոպա արևմտյան Բալկանների երթուղիով

Օրբանը հայտարարել է, որ եվրոպական երկրների առաջնորդները լիազորված չէին արտոնել հարյուր հազարավոր փախստականների մուտքը ԵՄ առանց բավարար վերահսկողության: «Դա ապակայունացնում է եվրոպական ժողովրդավարությունը»,-հայտարարել է Օրբանը տեղական հեռուստատեսության եթերում: »Մենք պետք է ազնիվ բանավեճ սկսենք մեր մայրցամաքի ապագայի մասին, առանց «քաղկոռեկտության» դիմակի, առանց կեղծավորության»,-հավելել է վարչապետը, հայտնում է ՌԻԱ Նովոստին:

Օրբանը նշել է, որ հարկավոր է լսել, թե ինչ կասի ժողովուրդը և նրա տեսակետը բարձրաձայնել նաև քաղաքականության մեջ: Ըստ նրա, եթե եվրոպական երկրները չկարողանան դա անել, նանց միգրացիոն ճգնաժամի հետ մեկտեղ նաև քաղաքական ճգնաժամ կսպառնա:

Եվրոպայում միգրացիոն ճգնաժամի պատճառով Հունգարիան պատ կառուցեց Սերբիայի հետ սահմանին: Այնուհետև սկսվեց պատի կառուցում նաև Սլովենիայի և Խորվաթիայի հետ սահմանին: Երկրի իշխանությունները հոկտեմբերի 15-ին հայտնեցին, որ պատնեշի կառուցումը Խորվաթիայի հետ սահմանին ավարտված է: Հունգարիայի խորհրդարանը նաև զգալիորեն խստացրել է միգրացիոն օրենսդրությունը` որպես պատիժ ազատազրկումն ընդունելով երկրի սահմաններն ապօրինի հատելու համար:

Հունգարիայի վարչապետը հայտարարել է նաև, որ Հունգարիայի կառուցած պատնեշների նպատակը միգրանտների հոսքը հետ ուղղելն է, ոչ թե դեպի Եվրոպա` մասնավորապես Գերմանիա ուղղելը: Նա հավելել է, թե որքան հեռու գնան փախստականներն, այնքան դժվար կլինի նրանց վերադարձնել: Ուստի, այդ մարդիկ պետք է իրենց տարածաշրջանում մնան, մարդկային պայմաններ նրանց համար այնտեղ է պետք ստեղծել:

ՄԱԿ տվյալներով, միայն 2015 թվականին ավելի քան 300 հազար փախստական է ժամանել Եվրոպա՝ պատերազմից և սովից փրկվելու նպատակով։ Նախորդ տարվա նույն ժամանակահատվածում նրանց քանակը մոտ 123,5 հազար էր, իսկ ամբողջ 2014-ին եղել է 280 հազար: Առաջին անգամ վերջին ամիսների ընթացքում հուլիսին ԵՄ ժամանած միգրանտների քանակը հատեց 100 հազարի սահմանն ու կազմեց 107,5 հազար:Նրանցից 2 հազար 500-ը մահացել է Եվրոպա հասնելու ճանապարհին:

Միգրացիոն ճգնաժամը Եվրոպայում ամենամեծն է Երկրորդ համաշխարհայինի տարիներից հետո: ԵՄ երկրների ներքին և արտաքին գործերի նախարարները մտադիր են հանդիպել Փարիզում հոկտեմբերին` քննարկելու համար ապօրինի ներգաղթյալների աննախադեպ հոսքը Եվրոպա: Ավելի ուշ հայտնի դարձավ, որ արտահաերթ խորհրդակցությունը տեղի կունենա սեպտեմբերի 14-ին Բրյուսելում: