Եվրահանձնաժողովն ընթացիկ տարում գրանցել է Եվրամիության սահմանների ապօրինի հատումների աննախադեպ աճ: Գերատեսչությունը խստորեն քննադատել է ԵՄ արտաքին սահմանների անարդյունավետ պաշտպանությունը:

2015 թվականը նշանավորվել է ԵՄ տարածք ապօրինի ներգաղթյալների ռեկորդային քանակի մուտքով: 2015-ի հունվար-նոյեմբերին գրանցվել է ԵՄ սահմանների ապօրինի հատման 1,28 մլն դեպք: Այս մասին ասվում է Եվրահանձնաժողովի հաղորդագրության մեջ, որից մեջբերումներ է ներկայացրել Die Welt-ը:

«Սա ռեկորդ է ԵՄ գոյության ամբողջ պատմության կտրվածքով»,-ասվում է «Եվրոպական սահմանների և ափերի պաշտպանության և ԵՄ արտաքին սահմանների արդյունավետ կահավորման մասին» փաստաթղթում, որը պաշտոնապես կներկայացվի դեկտեմբերի 15-ին: Համեմատության համար փաստաթղթում նշվում է, որ 2009-2014 թթ. գրանցվել է սահմանի ապօրինի հատման 413 հազար դեպք:

Եվրահանձնաժողովը խստորեն քննադատել է ԵՄ արտաքին սահմանների պաշտպանությունը, որն ըստ այդ գնահատականի, բացարձակ համարժեք չէ: Փաստաթղթում ասվում է, որ «երրորդ երկրների քաղաքացիները կարող էին ապօրինի հատել ԵՄ արտաքին սահմանները և շարունակել տեղաշարժվել Եվրամիության տարածքով առանց նախնական նույնականացման, գրանցման ու անվտանգության ստուգման», ինչը հարցականի տակ է դնում «այսպես կոչված Շենգենի գոտու ամբողջականությունը»:

Փաստաթղթի հեղինակները կոչ են արել անհապաղ անհրաժեշտ միջոցներ ձեռնարկել: «Եվրոպային հզոր և կուռ քաղաքականություն է պետք ԵՄ արտաքին սահմանները պաշտպանելու համար` հիմնված ընդհանուր պատասխանատվության սկզբունքի վրա»:

Միգրացիոն ճգնաժամը Եվրոպայում ամենամեծն է Երկրորդ համաշխարհայինի տարիներից հետո: 2015-ի հուլիսին ԵՄ ժամանած միգրանտների քանակը հատեց 100 հազարի սահմանն ու կազմեց 107,5 հազար:Նրանցից 2 հազար 500-ը մահացել է Եվրոպա հասնելու ճանապարհին:

Ընդհանուր առմամբ, 2015-ին Եվրոպայի ճանապարհն է բռնել մոտ 1 միլիոն փախստական: Փախստականների ուղին սկսվում է Սիրիայից, Լիբիայից և միջերկրածովյան այլ երկրներից: Նրանք նավակներով հասնում են Հունաստանի, Իտալիայի կղզիներ, այնուհետև ճանապարհը շարունակում հյուսիս՝ Գերմանիա, Ավստրիա, Ֆրանսիա, Շվեդիա, Մեծ Բրիտանիա: