Սիրիայի ԶՈւ Գլխավոր շտաբը հայտարարել է, որ կոալիցիան ավիահարված է հասցրել «Իսլամական պետության» քիմզենքի պահեստին Դեր Զորում: Ըստ Դամասկոսի, հարյուրավոր մարդիկ են զոհվել, այդ թվում խաղաղ բնակիչներ:

Զոհերի քանակը ճշտվում է: Հարվածը հասցվել է Դեր Զորի Ջալթա արվարձանին, հայտնում է Meduza-ն սիրիական SANA-ի վրա հղումով:

Հարվածը հասցվել է ապրիլի 11-ին տեղի ժամանակով 17:30-17:50-ի սահմաններում:

«Ավիահարվածի վայրում սպիտակ ամպ է գոյացել, հետո՝ դեղին: Դա վկայում է մեծ քանակի թունավոր նյութերի առկայության մասին: Հրդեհը տևել է մինչև 22:30-ը», ասվում է կոմյունիկերում, հայտնում է ՌԻԱ Նովոստին:

Ապրիլի 11-ին ՌԴ նախագահ Վլադիմիր Պուտինը հայտարարել էր, որ Սիրիայում սադրանք է պատրաստվում քիմիական զենքի կիրառմամբ, որի համար կմեղադրեն Դամասկոսին:

ԱՄՆ պետքարտուղար Ռեքս Թիլերսոնն ապրիլի 12-ին Մոսկվայում ՌԴ նախագահ Վլադիմիր Պուտինի և իր պաշտոնակից ՌԴ ԱԳ նախարար Սերգեյ Լավրովի հետ քննարկել է հակամարտությունները Սիրիայում: Սիրիայում քիմզենքի կիրառման հարցում կողմերի կարծիքները տարբեր են եղել: ԱՄՆ-ն վստահ է, որ քիմզենքով ռումբերը կառավարական ավիացիան է գցել, և դա իր ապացույցներն ունի: Նա հայտարարել է, որ Ասադը պետք է հեռանա, իսկ նրա մերձավոր դաշնակից Ռուսաստանը կարող է օգնել նրան հասկանալ, որ դա անխուսափելի է: