Իրաքյան Քրդստանի անկախանալու դեպքում հայերենն այդ նորանկախ երկրում պաշտոնական լեզվի կարգավիճակ կունենա: Իրաքյան Քրդստանում սեպտեմբերի 25-ին ընթացող անկախության հանրաքվեի Բարձրագույն խորհրդի անդամները ներկայացրել են քրդական ղեկավարության ծրագրերը, եթե ինքնավարությունն անկախություն ստանա Բաղդադից:
Փաստաթուղթը երաշխավորում է տարածաշրջանում բնակվող բոլոր ազգային և կրոնական խմբերի հավասար ազգային, քաղաքական, կրոնական, մշակութային և վարչական իրավունքները: Որպես պաշտոնական լեզու ընդունված կլինեն քրդերենը, արաբերենը, հայերենը, ասորերենն ու թուրքոմանների լեզուն:
Փաստաթղթով նախատեսվում է նաև, որ բոլոր վերոնշյալ ժողովրդները կունենա լիակատար ներկայցվածություն պետական հաստատություններում, կլինեն անկախ պետության կառավարության իրական գործընկերները: Իսկ դաշնային համակարգի շրջանակում արաբները, եզդիներն ու թուրքոմանները ինքնուրույն կղեկավարներ իրենց տարածաշրջանները: Փաստաթուղթը քննարկման կդրվի քրդական խորհրդարանի առաջիկա նստաշրջանում, գրում է ՏԱՍՍ-ը:
Իրաքյան Քրդստանում ընթացող անկախության հանրաքվեն, ըստ քրդական լրատվամիջոցների, բնականոն է անցնում: Ընտրատեղամասերի առաջ երկար հերթեր են գոյացել, քանի որ մարդիկ շտապում են քվեարկության: Հանրաքվեի նախնական արդյունքները հայտնի կլինեն ընտրատեղամասերը փակվելուց հետո 24 ժամվա ընթացքում:
