Հայազգի ռուսաստանաբնակ գործարար, Yota օպերատորի համահիմնադիր, ՌԴ ամենահարուստ մարդկանցից մեկը՝ Ալբերտ Ավդոլյանը գնել է ածխի (կոքս) Էլգինի հանքավայրը, որն ամենամեծն է Ռուսաստանում և ամենախոշորներից մեկն աշխարհում։ Այդ մասին տեղեկացրել է ռուսական լեռնահանքային «Մեչել» ընկերությունը, որը վաճառել է ակտիվներն Ավդոլյանին։

Հանքավայրը գտնվում է Յակուտիայում, ածխի պաշարները կազմում են 2․2 մլրդ տոննա։

«Մեչելը» հայտնել է, որ ավարտել է Էլգինի ածխի նախագծի իրեն պատկանող բաժնետոմսերի 51%-ի վաճառքն Ավդոլայնին պատկանող «Ա-Պրոպերտի» ընկերությանը։ Գործարքի գումարը կազմել է 89 մլրդ ռուբլի (մոտ 12 մլրդ դոլար)՝ ներառյալ պարգևավճարը բաժնետոմսերի հսկիչ փաթեթի համար։

«Մեչելը» պարտքերի պատճառով չի կարողացել զարգացնել Էլգինի նախագիծը։ Ընկերությունը մի քանի տարի է` ներդրողներ էր որոնում։

Ավդոլյանը Forbes-ի վարկածով ՌԴ 200 ամենահարուստ գործարարներից է և զբաղեցնում է 113-րդ տեղը։ Նրա կարողությունը գնահատվում է $800 մլն։