Կարճվել է «Քառյակ Մեդիա» ընկերության համահիմնադիր, նախկին պատգամավոր Միհրան Հակոբյանի և մյուսների նկատմամբ հարուցված քրեական գործը։ Այդ մասին ֆեյսբուքյան իր էջում հայտնել է նրա փաստաբան Միքայել Շխիմյանը։
Գործը կարճվել է հանցակազմի բացակայության պատճառով։
«Երկարատև քննությունից հետո հանցակազմի բացակայությամբ կարճվել է «Քառյակ Մեդիա» ընկերության համահիմնադիր, նախկին պատգամավոր Միհրան Տարոնի Հակոբյանի և մյուսների նկատմամբ՝ օրենքով սահմանված կարգի խախտմամբ 2020 թվականի նոյեմբերի 19-ին Բաղրամյան պողոտա-Դեմիրճյան խաչմերուկ հատվածում հավաք կազմակերպելու և անցկացնելու փաստի առթիվ հարուցված քրեական գործը, որի շրջանակներում վերջինս ձերբակալվել էր: Այնուհետև դատարանի որոշմամբ ձերբակալումը ճանաչվել էր ոչ իրավաչափ, ոչ իրավաչափ էր ճանաչվել նաև այս գործով Հակոբյանի բնակարանում տեղի ունեցած խուզարկությունը»,-ասվում է գրառման մեջ։
