Գլխավոր դատախազ Աննա Վարդապետյանին արդարադատության երրորդ դասի պետական խորհրդականի դասային աստիճան (արդարադատության գեներալ–մայոր) է շնորհել։ ՀՀ նախագահ Վահագն Խաչատուրյանը ստորագրել է համապատասխան հրամանագիրը։
Զինվորական դատախազ, գլխավոր դատախազի տեղակալ, արդարադատության առաջին դասի խորհրդական Գրիգոր Վալիկոյի Էլիզբարյանին շնորհվել է արդարադատության երրորդ դասի պետական խորհրդականի դասային աստիճան:
Դատախազության աշխատողի օրվա կապակցությամբ, օրինականության և իրավակարգի ամրապնդման գործում ներդրած ավանդի համար Հանրապետության նախագահը Մխիթար Գոշի մեդալով պարգևատրել է նաև դատախազության մի շարք աշխատակիցների։
Պարգևատրման հանդիսավոր արարողությունից հետո նախագահը հանդես է եկել ելույթով:
«Հայաստանի Հանրապետությունում օրինականության և իրավակարգի պահպանության ու ամրապնդման գործում անհնար է գերագնահատել դատախազության դերը և այս խնդիրների լուծման համար անհրաժեշտ է յուրաքանչյուր աշխատակցի անաչառ ու պատասխանատու ներդրումը:
Ձեր գործունեության անկյունաքարը Հայաստանի Սահմանադրությունն է, իսկ հիմնական առաքելությունը մեր երկրում սահմանադրականության, ժողովրդավարության և մարդու հիմնարար իրավունքների պաշտպանությունը:
Հայաստանի անկախացումից ի վեր դատախազությունը, որպես միասնական համակարգ անցել է կայացման դժվարին ճանապարհ՝ բախվելով բազմաթիվ արատավոր երևույթների»,-ասել է նախագահը:
