ՀՀ նախագահ Վահագն Խաչատուրյանն Արգենտինայի նորընտիր նախագահի երդմնակալության արարողության շրջանակում Բուենոս Այրեսի «Կասա Ռոսադա» նախագահական պալատում հանդիպումներ է ունեցել մի շարք երկրների ղեկավարների, այդ թվում՝ Ուկրաինայի նախագահ Վլադիմիր Զելենսկու։
ՀՀ նախագահը հանդիպել է նաև Իսպանիայի թագավոր Ֆիլիպե 6-րդի, Ուրուգվայի նախագահ Լուիս Լակալե Պոուի, Պարագվայի նախագահ Սանտյագո Պենայի, Չիլիի նախագահ Գաբրիել Բորիչի և Հունգարիայի վարչապետ Վիկտոր Օրբանի հետ։
Հանդիպումների ընթացքում քննարկվել են երկկողմ հարաբերություններին վերաբերող հարցեր, առկա ներուժի լիակատար իրագործման միջոցներ։
Օտարերկրյա գործընկերների հետ զրույցների ընթացքում նախագահ Վահագն Խաչատուրյանը մանրամասներ է հայտնել տարածաշրջանում կայուն և տևական խաղաղության հաստատմանն ուղղված հայկական կողմի քայլերի վերաբերյալ՝ անդրադառնալով Հայաստանի կողմից առաջ քաշված «Խաղաղության խաչմերուկ» հայեցակարգի հիմնական սկզբունքներին և դրույթներին։
Հանրապետության նախագահ Վահագն Խաչատուրյանը Բուենոս Այրեսի «Կասա Ռոսադա» նախագահական պալատում մասնակցել է Արգենտինայի Հանրապետության նորընտիր նախագահ Խավիեր Միլեյի երդմնակալության արարողությանն ու հանդիսավոր միջոցառումներին։ Վերջիններիս շարքում Հանրապետության նախագահը Բուենոս Այրեսի մայր տաճարում մասնակցել է միջկրոնական արարողությանը։ Նա հանդիպում է ունեցել նաև տեղի հայ համայնքի հետ։
