Amnesty International իրավապաշտպան կազմակերպությունը Վրաստանի իշխանություններին կոչ է արել չարտահանձնել Ադրբեջանին լրագրող Աֆղան Սադիգովին, որը ձերբակալվել է օգոստոսի 3–ին և այժմ գտնվում է արտաքսման բանտում։

AzelTV-ի գլխավոր խմբագիր Սադիգովը 2020 թվականին Ադրբեջանում դատապարտվել էր 7 տարվա ազատազրկման, 2023-ին համաներմամբ ազատ էր արձակվել և ապրում է Վրաստանում։

Կազմակերպության Արևելյան Եվրոպայի և Կենտրոնական Ասիայի ծրագրերի փոխտնօրեն Դենիս Կրիվոշեևը հայտարարել է, որ Վրաստանը պետք է կատարի իր միջազգային պարտավորությունները և հրաժարվի Սադիգովին արտահանձնելու որոշումից, գրում է Turan.az-ը։

Նա ընդգծել է, որ արտահանձնումը ռիսկեր է պարունակում, ներառյալ մարդու իրավունքների լուրջ խախտումներ, կտտանքներ, կամայական ձերբակալություն և անարադար դատավարություն։ Նա Սադիգովի դեպքը նշել է անկախ ԶԼՄ–ների ճնշման ավելի լայն ուղղվածության մի մաս, որն ավելի է սաստկացել COP 29-ին ընդառաջ։