Ինքնագլոր վարելու կարգը խախտելու համար տուգանքներ կսահմանվեն` oրենսդրական նախաձեռնությամբ կկանոնակարգվի անհատական շարժունակության (տեղաշարժման) միջոցների գործունեությունը: ԱԺ պաշտպանության և անվտանգության հարցերի մշտական հանձնաժողովը դրական եզրակացություն է տվել։
Առաջին ընթերցմամբ քննարկվել է ««Ճանապարհային երթեւեկության անվտանգության ապահովման մասին» օրենքում լրացումներ եւ փոփոխություն կատարելու մասին» եւ «Վարչական իրավախախտումների վերաբերյալ ՀՀ օրենսգրքում փոփոխություններ եւ լրացումներ կատարելու մասին» օրենքների նախագծերի փաթեթը:
ՀՀ ներքին գործերի նախարարի տեղակալ Դավիթ Համբարյանը, ներկայացնելով նախագիծը, նշել է, որ սահմանվել են նման փոխադրամիջոցների բնութագրերը և հնարավոր սահամանափակումները: Ըստ այդմ՝ 18 տարեկանից բարձր տարիք ունեցող, ինչպես նաև 16 տարին լրացած և AM ենթակարգի տրանսպորտային միջոց վարելու իրավունք ունեցող անձանց կողմից անհատական շարժունակության (տեղաշարժման) միջոցներով երթևեկությունը կթույլատրվի հեծանվային կամ հեծանվահետիոտնային արահետներով կամ հեծանվորդների համար գոտիով:
Նախագծով սահմանվել է, որ օրենքով նախատեսված կարգավորումներից բացի, համայնքում անհատական շարժունակության (տեղաշարժման) միջոցների երթևեկության արգելված վայրերը սահմանվելու են համայքի ավագանու կողմից:
Ներկայացվող պահանջները խախտելու համար նախատեսվել է տուգանքի նշանակում՝ սահմանված նվազագույն աշխատավարձի հնգապատիկի չափով: Մասնավորապես, ապրանքների առաքում իրականացնող հեծանիվ կամ մոպեդ վարող անձի կողմից հեծանիվը կամ մոպեդն առանց սաղավարտի կամ չկոճկված սաղավարտով վարելու համար նախատեսվել է տուգանքի նշանակում՝ սահմանված նվազագույն աշխատավարձի յոթնապատիկի չափով:
Համբարյանը նշել է, որ օրենսդրական նախաձեռնությամբ առաջարկվող կարգավորումներով բոլոր հիմնական ռիսկերը հնարավորինս հասցեագրվել են: Տուգանքների չափերը սահմանելիս՝ կիրառվել է բալանսավորված մոտեցում:
