ՄԱԿ-ի Գլխավոր ասամբլեայի նստաշրջանում իր ելույթի ընթացքում Թուրքիայի նախագահ Ռեջեփ Թայիփ Էրդողանն անդրադարձել է հայ-ադրբեջանական խաղաղ գործընթացին՝ նշելով, որ Ադրբեջանի և Հայաստանի միջև խաղաղության գործընթացում առաջընթացը կարտացոլվի նաև հայ-թուրքական հարաբերությունների վրա։
Նա հավելել է, որ Թուրքիան աջակցում է Ադրբեջանի և ՀՀ միջև խաղաղության գործընթացին, հայտնում է «Ամերիկայի ձայնը»։
«Մենք հուսով ենք, որ այդ աշխատանքը կավարտվի որքան հնարավոր է շուտ։ Առաջընթացն Ադրբեջանի և Հայաստանի միջև խաղաղ գործընթացում կարտացոլվի նաև Թուրքիայի և Հայաստանի հարաբերությունների վրա», - հայտարարել է Էրդողանը։
ՄԱԿ-ի Գլխավոր վեհաժողովի 79-րդ նստաշրջանի շրջանակում տեղի է ունեցել Հայաստանի վարչապետ Նիկոլ Փաշինյանի և Թուրքիայի նախագահ Ռեջեփ Թայիփ Էրդողանի հանդիպումը: Զրուցակիցները մանրամասն անդրադարձել են Հայաստան-Թուրքիա հարաբերությունների կարգավորման գործընթացի շրջանակում արդեն իսկ կատարված քայլերին և առկա պայմանավորվածություններին: Ընդգծվել է կարգավորման գործընթացն առանց նախապայմանների շարունակելու և հարաբերություններին նոր ազդակ հաղորդելու պատրաստակամությունը: Կողմերն անդրադարձ են կատարել նաև տարածաշրջանային հարցերին:
