Ռուսաստանում ՀՀ նորանշանակ դեսպան Գուրգեն Արսենյանն իր հավատարմագրերը ՌԴ նախագահ Վլադիմիր Պուտինին հանձնելու արարողության ժամանակ լրագրողների հետ հանդիպմանն ասել է, որ Ադրբեջանում պահվող հայ գերիների ազատումը մեծապես կնպաստի Երևանի և Բաքվի հաշտեցմանը։

«Այսպիսի քայլը շատ կնպաստի հաշտեցմանը»,–ասել է նա, հայտնում է ՏԱՍՍ–ը։

Արսենյանը հավելել է, որ գերիների և մյուս պահվող անձանց մասին բոլոր մյուս հարցերը պետք է հասցեագրել ադրբեջանական կողմին։ Նա նաև ասել է, որ եթե Երևանն ու Բաքուն գնում են դեպի խաղաղության պայմանագիր, պատրաստվում են հայտարարել աշխարհին, որ «երկու պետությունները, երկու ազգերը խաղաղ են ապրելու և համագործակցելու են, ապա պետք է սկսել այն քայլերից, որոնք «պետք է գնահատվեն»։

Արսենյանը հրաժարվել է մեկնաբանել առանձին հարցն Ադրբեջանում պահվող նախկին ռուսաստանցի գործարար Ռուբեն Վարդանյանի մասին՝ նշելով, որ Երևանը տարբերություն չի դնում ՀՀ քաղաքացիների միջև։

Պաշտոնական տվյալներով` Ադրբեջանում 23 հայ գերի է պահվում, որոնցից 17-ը գերեվարվել են 2023 թվականի ագրեսիայի հետևանքով։ Բաքվի դատարանը 5 ամսով երկարացրել է Արցախի նախկին պետնախարար, բարերար Ռուբեն Վարդանյանի, Արցախ ռազմաքաղաքական ղեկավարության ներկայացուցիչներ Արայիկ Հարությունյանի, Բակո Սահակյանի, Արկադի Ղուկասյանի, Դավիթ Բաբայանի, Դավիթ Իշխանյանի, Դավիթ Մանուկյանի ե Լեոն Մնացականյանի ապօրինի կալանքի ժամկետը։ Նրանք բոլորը ձերբակալվել են 2023-ի սեպտեմբերի վերջին՝ Արցախից ՀՀ անցնելու ժամանակ, երբ ԱՀ-ն հայաթափվեց Ադրբեջանի ագրեսիայի հետևանքով։