Մեքսիկան հրաժարվել է ընդունել ԱՄՆ ռազմական ինքնաթիռը, որը տեղափոխում էր արտաքսվածների, հայտնում է NBC News-ը։

Հունվարի 23-ին ԱՄՆ ռազմական երկու C-17 ինքնաթիռ ուղևորվել է Գվատեմալա՝ տեղափոխելով մոտ 80-ական մարդ։ Երրորդ թռիչքը, որը նախատեսված էր Մեքսիկայի համար, չի իրականացվել։

Մեքսիկայի արտաքին գործերի նախարարությունը խուսափել է պարզաբանել վայրէջքի մերժման պատճառները։

Հայտարարության մեջ նշվում է. «Երբ խոսքը վերաբերում է հայրենադարձմանը, մենք միշտ պատրաստ ենք ընդունել մեքսիկացիներին մեր տարածքում»։

ԱՄՆ Սպիտակ տունը նշել է, որ խնդիրը «վարչական բնույթի» էր և արագ լուծվել է։ ԱՄՆ նախագահի մամուլի քարտուղար Քարոլայն Լևիթը X-ի իր էջում գրել է, որ Մեքսիկան արտաքսվածների տեղափոխող 4 չվերթ է ընդունել, հայտնում է «Վեդոմոստին»։

«Մեքսիկան մեկ օրում ընդունեց ռեկորդային քանակով՝ չորս արտաքսման թռիչք»,–գրել է նա։

Այս որոշումը համընկել է ԱՄՆ-ի հետ լարվածության աճի հետ՝ Թրամփի նախագահի պաշտոնը ստանձնելուց հետո։ Թրամփը սպառնացել էր Մեքսիկայից ներմուծվող ապրանքների վրա 25% մաքսատուրք սահմանել՝ որպես ճնշման միջոց ապօրինի միգրացիայի հարցում։ Մեքսիկայի նախագահ Կլաուդիա Շեյնբաումը հայտարարել է, որ երկիրը պատրաստ է աջակցել արտաքսվածներին և համագործակցել ԱՄՆ-ի հետ այս հարցում, սակայն քննադատել է Վաշինգտոնի միակողմանի քայլերը։

Արտաքսման թռիչքները կազմակերպվում են Թրամփի վարչակազմի լայնածավալ արշավի շրջանակներում, որի նպատակն է պայքարել ապօրինի միգրացիայի դեմ։ Այս միջոցառումները հիմնված են նախագահի պաշտոնավարման առաջին շաբաթում ստորագրված հրամանագրերի վրա։ Թրամփը նախընտրական արշավի ժամանակ խոստացել էր կանգնեցնել ապօրինի միգրացիան և արագացնել ապօրինի բնակվող միգրանտների արտաքսումը։