Կառավարությունն ընդունել է «Մասնագիտական կրթության և ուսուցման ծրագրով աշխատանքի վրա հիմնված ուսումնառության շրջանակում գործնական աշխատանքային ուսուցում անցնող և որոշակի աշխատանք կատարող 16-18 տարեկան անձանց՝ ալկոհոլային խմիչքների արտադրության մեջ, ինչպես նաև ՀՀ օրենսդրությամբ սահմանված ծանր, վնասակար, առանձնապես ծանր, առանձնապես վնասակար աշխատանքներում, ինչպես նաև մինչև տասնութ տարեկան անձանց համար ծանր և վնասակար համարվող աշխատանքներում ներգրավելու, նրանց առողջությունը և անվտանգությունը պահպանելու պայմանները սահմանելու մասին» որոշում:
Կառավարության նիստում ԿԳՄՍ նախարար Ժաննա Անդրեասյանը հայտնել է, որ նախորդ՝ 2023-2024 ուսումնական տարում 9-րդ դասարանի շրջանավարտների մոտ 30%-ը նախընտրել է կրթությունը շարունակել մասնագիտական կրթության և ուսուցման (ՄԿՈւ) համակարգում։
Նրա խոսքով, դուալ կրթության համակարգն արդեն գործում է, որի շրջանակում ուսանողներն ու աշակերտները միաժամանակ սովորում և աշխատում են։ Քանի որ այստեղ ընդգրկված են անչափահասներ, անհրաժեշտ է ստեղծել նրանց առողջությունն ու անվտանգությունն ապահովող մեխանիզմներ։
Նախագծում հստակեցվում է, թե ինչպիսի պայմաններ պետք է ապահովվեն, որպեսզի 16-18 տարեկան անձինք ներգրավվեն օրենքով թույլատրելի աշխատանքներում՝ առանց առողջության կամ բարոյականության վրա բացասական ազդեցության։
Անդրեասյանի խոսքով՝ դուալ ուսուցմամբ կրթական ծրագրեր ներկայում իրականացվում են 21 հաստատությունում՝ 27 մասնագիտությունների գծով, և այդ ցանկը շարունակում է ընդլայնվել։
Վարչապետ Նիկոլ Փաշինյանը հավելել է. «Նախագծի հաջորդ կարևորագույն հատվածը հետևյալն է, որ մենք քոլեջների կառավարման համակարգերում ներգավենք իրական տնտեսության այն ներկայացուցիչներին, ում համար հայեցակարգային մակարդակով և գործնականում պետք է պատրաստենք կադրեր»։
ԿԳՄՍ նախարարը տեղեկացրել է՝ առաջիկայում նախատեսվում է Մասիսի Գյուղատնտեսական քոլեջում ձկնաբուծության ուղղությամբ ավելի սերտ աշխատանքներ, քոլեջ է վերակառուցվում Նոր Գեղիում, որը հատկապես ինտեսիվ գյուղատնտեսության, ջերմատնային տնտեսության մասով կարող է ակտիվ համագործակցություն ունենալ:
