ՈւԵՖԱ Ազգերի լիգայի փլեյ-օֆֆ փուլում կայացած Վրաստան-Հայաստան պատասխան հանդիպումից հետո մարզադաշտում լարված իրավիճակ է ստեղծվել՝ վրացի երկրպագուների կողմից նետվել են տարբեր առարկաներ հայ երկրպագուների ուղղությամբ։

Արձագանքելով միջադեպին՝ վրացի ակտիվիստ, կինեմատոգրաֆում կանանց դերի և գենդերային ներկայացվածության հարցերով զբաղվող փորձագետ Թամթա Թաթարաշվիլին ֆեյսբուքյան իր էջում գրել է, որը հայերը հայերը 10։0 հաղթեցին վրացիներին հյուրընկալությամբ և մարդկային հատկանիշներով։

«Հայերը 10:0 հաղթեցին մեզ՝ հյուրընկալությամբ, մշակույթով, էթիկայով և մարդկային հատկանիշներով։

Խայտառակություն և ամոթ․ թող գոնե հավաքականը կամ ֆեդերացիան արձագանքեն այս ամենին և ներողություն խնդրեն հայկական կողմից»,- գրել է նա։

Վրաստանի ֆուտբոլի ազգային հավաքականի ֆան շարժումը ներողություն է խնդրել հայ ֆուտբոլասերներից` Թբիլիսիում կայացած Վրաստան-Հայաստան խաղի ժամանակ վրացի երկրպագուների խմբի սադրիչ պահվածքի համար: Այդ մասին տեղեկություն է տարածել «Հայկական առաջին ճակատ» երկրպագուական շարժման համահիմնադիր Սերգեյ Ջանջոյանը, հայտնում է Արմենպրեսը։

«Վրաստանի հավաքականի ֆան շարժումը՝ «Կոմագեբին», ներողություն է խնդրել մեզնից մարզադաշտի իրենց մի քանի տասնյակ երկրպագուների ու սխալ պահվածքի համար, սոլիդարություն հայտնել մեր պայքարում։ Ինչպես նշել եմ մի քանի անգամ, ֆուտբոլի միջոցով ոչ մի դեպքում մեր 2 երկրների ժողովուրդների մեջ չպետք է թշնամանք ու բացասական տրամադրվածություն առաջանա, մեր թշնամիները մեզ հերիք են։ Իսկ նշածս քայլը, կարծում եմ, կնպաստի, որ մեր երկրների ֆան ակումբները ավելի մտերմանան»,- նշել է Ջանջոյանը:

Նա հավելել է, որ վրացի երկրպագուների սադրիչ գործողությունների մասին կխոսի ավելի ուշ։

ՈւԵՖԱ-ի Ազգերի լիգայի անցումային փլեյ-օֆֆի պատասխան հանդիպմանը Հայաստանի ազգային հավաքականը հյուրընկալվել է Վրաստանի ընտրանուն՝ պարտվելով 1։6 հաշվով։ Խաղի ավարտին վրացի երկրպագուներից մի խումբ ներխուժել են խաղադաշտ և փորձել մոտենալ հայ երկրպագուների հատվածին՝ նրանց ուղղությամբ նետելով պլաստիկե ու մետաղական տարաներ։