Վարչապետ Նիկոլ Փաշինյանն ու ԱՄՆ պետքարտուղար Մարկո Ռուբիոն հեռախոսազրույցում քննարկել են ռազմավարական գործակցությունը և տարածաշրջանային զարգացումները։

Զրույցի ընթացքում կողմերն անդրադարձել են Հայաստան-ԱՄՆ ռազմավարական գործընկերությանն առնչվող, ինչպես նաև տարածաշրջանային օրակարգի մի շարք հարցերի, հայտնում է վարչապետի աշխատակազմը։ Փաշինյանը Ռուբիոյին ներկայացրել է բանակցային ընթացքը, որի արդյունքում ձեռք է բերվել «Հայաստանի Հանրապետության և Ադրբեջանի Հանրապետության միջև խաղաղության և միջպետական հարաբերությունների հաստատման մասին» համաձայնագրի նախագծի համաձայնեցում։

Փաշինյանն ընդգծել է, որ նշված նախագիծն արդեն պատրաստ է ստորագրման։

Իր հերթին, Պետդեպի խոսնակ Թեմի Բրյուսը հայտնել է, որ ԱՄՆ կողմերը քննարկել են երկու երկրի՝ որպես ռազմավարական դաշնակիցների, համատեղ նպատակները։ Պետքարտուղար Ռուբիոն ողջունել է Ադրբեջանի հետ խաղաղության պայմանագրի ձեռքբերումը՝ ընդգծելով, որ կայուն խաղաղությունն անհրաժեշտ է տարածաշրջանային լարվածությունը հաղթահարելու, ինչպես նաև Հարավային Կովկասում անվտանգությունն ու բարեկեցությունն ապահովելու համար։

Ընդգծվել է նաև, որ ցանկացած տեսակի նոր լարվածություն տարածաշրջանում անընդունելի է։

Զրուցակիցները նաև համաձայնեցրել են շարունակել բարձր մակարդակի շփումները Հայաստանի և ԱՄՆ-ի միջև։