Հավանաբար, որոշ մարդիկ չեն հասկացել, որ «Տաշիր 2011» համահայկական երաժշտական մրցանակը շոու ծրագիր է, այլ ոչ թե բարեգործական ակցիա: Այդ մասին Երևանում մամլո ասուլիսում հայտարարել է «TASHIR Media»-ի գլխավոր տնօրեն Հրանտ Բաբասյանը: Նրա խոսքերով, ընկերությունը կարողացել է կազմակերպել հիանալի շոու, որը միայն դրական արձագանքներ է ստացել հայկական սփյուռքի կողմից:

Իր հերթին, «Տաշիր 2011»-ի գլխավոր պրոդյուսեր Մարկ Սաղաթելյանը հաղորդել է, որ մրցանակաբաշխությունը հավաքել է ամենաբարձր վարկանիշները: Նրա խոսքերով, հայ հեռուստադիտողների 80 տոկոսը դիտել են մրցանակաբաշխության հեռարձակումը: «Սակայն պետք է նշել, որ ինձ զարմացրել է շատ մարդկանց արձագանքն այն առիթով, որ հայկական էստրադայի աստղերին մրցանակաբաշխության ժամանակ նվիրել են բնակարաններ»,- ասել է նա: Միաժամանակ, նա գնահատել է դա որպես սև PR ակցիա: Նրա խոսքերով, «Տաշիր 2011»-ի մրցակիցները նախանձել են, որ այն այդքան հաջող է ընթացել:

Անդրադառնալով նրան, թե ինչի հիման վրա են կազմակերպիչներն ընտրել տարբեր անվանակարգերում հաղթողներին, Սաղաթելյանն ասել է, որ ընտրությունը կատարվել է փաստերի, ինչպես նաև արտիստների արձանագրած հաջողությունների հիման վրա: Սակայն, նա խոստովանել է, որ ընտրությունը սուբյեկտիվ է եղել: