Հոկտեմբերի 6-ին Երևանում իր աշխատանքն է սկսել Եվրասիայի Կենտրոնական դեպոզիտարիաների ասոցիացիայի (ԵԿԴԱ) և ԱՊՀ երկրների Բորսաների միջազգային ասոցիացիայի (ԱՊՀ ԲՄԱ) համատեղ առաջին միջազգային համաժողովը: «Տեղի ունեցող ինտեգրացիոն գործընթացների ոլորտում այսօրվա համաժողովի թեման հատկապես արդիական է` «Տեղական շուկաների գլոբալ հնարավորությունները. ենթակառուցվածք և կարգավորում»,- ասել է ՆԱՍԴԱՔ ՕԷՄԵՔՍ Արմենիա ՓԲԸ-ի գլխավոր տնօրենի պաշտոնակատար Կոնստանտին Սարոյանը: Նրա խոսքով, վերջին տարիների բարդ տնտեսական իրավիճակում յուրաքանչյուր երկիր մշակել է իր մոտեցումները, որոնել է նոր, ոչ ստանդարտ լուծումներ ստեղծված իրավիճակից դուրս գալու համար: «Մաղթում եմ, որպեսզի այսօրվա համաժողովը հարթակ դառնա ոչ միայն փորձի և տեղեկատվության փոխանակման համար, այլ նաև յուրահատուկ ինկուբատոր դառնա ֆոնդային բորսաների և դեպոզիտարիաների համագործակցության երկարաժամկետ զարգացման համար»,- ասել է նա:

Գլխավոր տնօրենը հույս է հայտնել, որ համաժողովը «տրամաբանական շարունակություն կունենա, քանի որ հաճախ մարդկանց շփումը կարևոր է տեխնիկական զարգացումից»:

Համաժողովին մասնակցում են ԱՊՀ երկրների, Եվրոպայի և Ասիայի ֆոնդային բորսաների և կենտրոնական դեպոզիտարիաների, ասոցիացիաների ներկայացուցիչներ, փորձագետներ: Մասնակիցների շարքում այնպիսի ընկերությունների թոփ-մենեջմենթն է, ինչպիսիք են Thomas Murray, SWIFT, ММВБ, Վնեշէկոնոբանկ, Euroclear, Clearstream և այլն:

Երկրորդ օրը տեղի կունենա Եվրասիայի Կենտրոնական դեպոզիտարիաների ասոցիացիայի (ԵԿԴԱ) և ԱՊՀ երկրների Բորսաների միջազգային ասոցիացիայի (ԱՊՀ ԲՄԱ) անդամների տարեկան ժողովը: