Ռուբեն Մամոյանը (62 կգ ք/կ) «պոկում» վարժությունում բարձրացրել է 120 կգ և նվաճել է փոքր ոսկե մեդալ, իսկ «հրում» վարժությունում Մամոյանն անհաջող հանդես եկավ:
94 կգ քաշային կարգում Հայաստանը ներկայացնում էր Վարդան Դավթյանը: Նա նվաճեց բրնոզե մեդալ: Երկամարտի արդյունքում նա բարձրացրեց 358կգ և զիջեց Սուտիֆոն Վատհանակասիկամուին Թայվանից միայն անձնական քաշով:
Բասկետբոլ. Հուլիսի 3-ին «Միկա» մարզահամալիրում կայացավ բասկետբոլի կանանց C դիվիզիոնի Եվրոպայի առաջնության եզրափակիչը: Խաղացին Հայաստանի և Մալթայի հավաքականները: Երկու թիմերն էլ արդեն նախքան եզրափակիչը իրավունք էին վաստակել 2011 թվականին մասնակցելու բասկետբոլի C դիվիզիոնի ԵԱ-ին: Եզրափակչում Մալթայի հավաքականի բասկետբոլիստուհիները վստահ խաղացին և կարողացան հաղթանակ տանել 65:74 հաշվով` դառնալով առաջնության հաղթողը: Հայաստանի հավաքականը կրեց միակ պարտությունը, մինչ այդ թիմը 4 հանդիպում էր անցկացրել և բոլորում հաղթել էր:
Շախմատ. Ջերմուկում ավարտվեց ՖԻԴԵ-ի շախմատի կանանց Գրան պրիի 4-րդ մրցաշարը, որի հաղթողը դարձավ Նանա Ձագնիձեն (Վրաստան): Նա առաջատար էր ողջ մրցաշարի ընթացքում: 11 հնարավոր միավորից նա հավաքեց 9 միավոր: Լիլիթ Մկրտչյանը վերջին տուրում ոչ ոքի խաղաց Բաիրա Կովանովայի (Ռուսաստան) հետ և, միավորներ կորցնելով, զբաղեցրեց 4-րդ տեղը: Էլինա Դանիելյանն այդ տուրում կարողացավ հաղթել Տատյանա Կոսինցևային (Ռուսաստան): Նա հավաքեց 6.5 միավոր և զբաղեցրեց 3-րդ տեղը` Մկրտչյանից առաջ անցնելով միայն լրացուցիչ արդյունքներով: Կոսինցևան 7.5 միավորով 2-րդ տեղում է:
Մրցաշարի հաղթողը ստացավ 6500 եվրո, դրամական պարգևներ են ստացել նաև բոլոր շախմատիստուհիները:
Մոսկվայում անցկացվող Դվորկովիչի հուշամրցաշարում Հայաստանի պատանեկան հավաքականը 12 տուրից հետո վաստակել է 15 թիմային և 24,5 անհատական միավոր և զբաղեցնում է 2-րդ տեղը: Առջևում է Չինաստանը` 23 (39) միավորով:
Ըմբշամարտ.Բուլղարիայի Սամոկով քաղաքում հուլիսի 5 -ին ավարտվեց Եվրոպայի հունահռոմեական ըմբշամարտի երիտասարդական առաջնությունը:
Հայաստանի ներկայացուցիչներից առավել հաջող հանդես եկավ բանակային Արթուր Ալեքսանյանը /84կգ, Գյումրի /: Նա հաղթանակով ավարտեց նախնական փուլերի բոլոր հադիպումները ու մտավ եզրափակիչ: Ոսկու համար պայքարում Արթուրը զիջեց մրցակցին, արժանացավ արծաթե մեդալի և տուն վերադարձավ փոխչեմպիոնի կոչումով: Նրա թիմակից Գևորգ Սահակյանը / 66կգ, Արտիմեդ / բավարարվեց երրորդ տեղով ու նվաճեց բրոնզե մեդալ:
Բռնցքամարտ. Ուկրաինայի Բերդիչև քաղաքում հունիսի 29-ից հուլիսի 4-ը անցկացվեց բռնցքամարտի միջազգային երիտասարդական բարձրագույն կարգի մրցաշար, որտեղ խաղարկվեցին օլիմպիական չեմպիոն Վլադիմիր Կլիչկոյի անվան մրցանակները: Մրցումներին մասնակցեցին 12 երկրների 74 մարզիկներ: Հայաստանից հանդես եկավ միայն Սինգապուրի ամառային օլիմպիական առաջին խաղերի ուղեգիր ունեցող Հրայր Մաթևոսյանը /60կգ ,Երևան /: Նա հաղթեց հաջորդաբար Ուզբեկստանի /13:2/,Ռուսաստանի /7:2 /,իսկ եզրափակիչում` Ադրբեջանի /3:2 / ներկայացուցչին և արժանացավ հաղթողի կոչմանը:
Ֆուտբոլ. Հուլիսի 1-ին «Ուլիսը»2010-2011թթ. Եվրոպայի լիգայի առաջին որակավորման փուլում Երևանի «Հրազդան» մարզադաշտում խաղացել է «Բնեյ Եhուդայի» (Իսրայել) դեմ:
Չնայած նրան, որ երկու թիմերն էլ գոլեր խփելու հնարավորություն ունեին, խաղն ավարտվեց ոչ ոքի: Պատասխան խաղը կկայանա հուլիսի 8-ին Թել Ավիվում:
Խաղից հետո «Ուլիսի» գլխավոր մարզիչ Սևադա Արզումանյանը նշեց, որ նրա սաների գործողություններում հուզմունք էր նկատվում: «Մենք գոլ խփելու 4 իրական հնարավորություն ունեինք, բայց չկարողացանք օգտագործել դրանք: Մեզ խանգարեց Կարեն Ալեքսանյանի և Շոթա Ջիկինի վնասվածքը, որոնց ստիպված փոխարինեցինք»,- ասել է Արզումանյանը: Իսկ իսրայելական ակումբի գլխավոր մարզիչ Դրոր Կաշտանը նշեց, որ նրա թիմն այդ խաղին սկսել է պատրաստվել 3 շաբաթ առաջ, և նրանց խաղին խանգարել է շոգը: «Հաշիվը մեզ համար ձեռնտու է, քանի որ հաջորդ խաղը կկայանա մեր մարզադաշտում, մենք այնտեղ կկարողանանք ավելի վստահ խաղալ և հաղթել»,- ասել է Կաշտանը:
Նույն օրը Լառնակայում «Բանանցը« հանդիպեց «Անորտոսիսի» հետ: Երևանյան ակումբը պարտվեց 0:3 հաշվով:
Հանգստյան օրերին կայացան ֆուտբոլի Հայաստանի Բարձրագույն լիգայի 7-րդ և 14-րդ տուրի 2 խաղերը: 3 պարտությունից հետո առաջնությունում 2010-ի Հայաստանի գավաթակիր և երկրի գործող չեմպիոն «Փյունիկը» Վ. Սարգսյանի անվան հանրապետական մարզադաշտում ընդունեց «Կիլիկիային» և հաղթեց 4:2 հաշվով:
«Գանձասարը» Կապանի քաղաքային մարզադաշտում 1:2 հաշվով զիջեց «Իմպուլսին»: «Միկա»-«Ուլիս» և «Շիրակ»-«Բանանց» խաղերը տեղափոխվել են Եվրոպայի լիգայի խաղերի պատճառով:
Մրցաշարային աղյուսակը 32 միավորով շարունակում է գլխավորել «Բանանցը», «Ուլիսը» 32 միավորով 2-րդ տեղում է, «Փյունիկը»` 3-րդ (29 միավոր):
Թենիս. Արգենտինայի թենիսի հավաքականը հուլիսի 9-11-ը Մոսկվայում Դևիսի գավաթի քառորդ եզրափակչում կխաղա Ռուսաստանի հավաքականի հետ:
Արգենտինայի կազմում ելույթ կունենան Դավիթ Նալբանդյանը, Օրասիո Սեբալոսը, Էդուարդո Շվանկը և Լեոնարդո Մայերը: Դավիթ Նալբանդյանը, որի հավաքականը 2006-ին Մոսկվայում Դևիսի գավաքի եզրափակչում 3:2 հաշվով զիջել է ռուսներին, ասել է. «Կարծում եմ, որ չի կարելի համեմատել 2006-ի խաղը և այս մենամարտը, որովհետև այն ժամանակ դա եզրափակիչ էր, իսկ հիմա մենք խաղում ենք քառորդ եզրափակչում: Մեր թիմի կազմն այժմ բոլորովին այլ է և ես հավատում եմ, որ այս հավաքականը հաջող ելույթ կունենա»:
Հուլիսի 8-ին «Օլիմպիական» մարզահամալիրի կենտրոնական կորտում տեղի ունեցավ խաղի վիճակահանությունը:
Հուլիսի 9-ին առաջինները կորտ դուրս կգան ռուսաստանցի Նիկոլայ Դավիդենկոն և արգենտինացիների երկրորդ համարը`
Դավիթ Նալբանդյանը: Այնուհետև նրանց կփոխարինեն Միխաիլ Յուժնին ու Լեոնարդո Մայերը:
Մեկ օր անց, զուգախաղում հանդես կգան Իգոր Կունիցինը և Թեյմուրազ Գաբաշվիլին կհանդիպեն Դավիոդ Նալբանդյանի ու Օրասիո Սեբալյոսի հետ: