Լեռնային Ղարաբաղի Հանրապետության (ԼՂՀ) Ազգային ժողովի այսօրվա նիստում ՀՅ Դաշնակցություն խմբակցության անունից նրա ղեկավար Արմեն Սարգսյանը հանդես է եկել հայտարարությամբ, որում ընդգծել է Արցախի կողմից Հայաստանի հետ միջպետական համաձայնագրի ստորագրման անհրաժեշտությունը: «Դրանով, նախ և առաջ, առավել կապահովվի Արցախի հայության անվտանգությունը, երկրորդը, դե յուրե նոր մակարդակի կբարձրանան Հայաստանի և Լեռնային Ղարաբաղի միջև հարաբերությունները, և երրորդը, դա լուրջ խթան կդառնա Լեռնային Ղարաբաղի ճանաչման գործընթացի համար»,- ասել է նա:
Արմեն Սարգսյանը նշել է նաև, որ համաձայնագրի ստորագրման անհրաժեշտությունը բացատրվում է այն հանգամանքով, «որ Լեռնային Ղարաբաղի հիմնախնդրի կարգավորումը նոր փուլ է մտել, և որ այդ իրադրության մեջ շարունակվում է Ադրբեջանի նախագահի ագրեսիվ վարքը, ով ողջ հայությանը դիտարկում է որպես Ադրբեջանի թշնամի», հաղորդում է Արցախի հանրային հեռուստատեսությունը:
