«Exit Poll» սոցիոլոգիական և սոցիալական հետազոտությունների կենտրոնն այսօր լրագրողների հետ հանդիպմանը ներկայացրեց «Ինչպե՞ս է կողմնորոշվում ընտրողն ընտրություն կատարելիս» հարցման արդյունքները: ՀԿ անդամ Լևոն Անդրեասյանը նշեց, որ ի սկզբանե իրենք մտադրություն չեն ունեցել արդյունքները հրապարակել, բայց որոշ փաստեր մտահոգիչ են, և իրենք որոշել են բարձրաձայնել այդ մասին:
«Հարցմանը մասնակցած 2710 հոգուց 195-ը այն մարդիկ են, որոնք պատկանում են տարբեր կրոնական կազմակերպությունների:
Նրանք միաձայն ասել են, որ բոլորը ձայնը տալու են մի կուսակցության՝ ընդդիմադիր»,- ասաց Անդրեասյանը, սակայն չմանրամասնեց, թե որ կուսակցության մասին է խոսքը:
«Exit Poll» սոցիոլոգիական և սոցիալական հետազոտությունների կենտրոնը հետազոտությունն անցկացրել է Սևծովյան-Կասպիցծովյան քաղաքական և սոցիալական հետազոտությունների հանրային ինստիտուտի պատվերով: Այն իրականացվել է մարտի 22-ից ապրիլի 8-ը Երևանում ու ՀՀ մարզկենտրոններում:
