Երևանի Ճարտարապետության և շինարարության պետական համալսարանի ուսանողները կկարողանան մասնագիտական պրակտիկա անցնել Orange-ում: Ինչպես PanARMENIAN.Net-ին տեղեկացրեց ընկերության հանրային կապերի պատասխանատու Լիլիթ Մարտիրոսյանը, Օրանժ Արմենիան ու Ճարտարապետության և շինարարության պետական համալսարանն ապրիլի 13-ին ստորագրել են հնգամյա համագործակցության հուշագիր, որի շրջանակում ընկերության տարբեր բաժինների` բարձր որակավորում և աշխատանքային փորձ ունեցող աշխատակիցները դասընթացներ կիրականացնեն ուսանողների համար, ինչպես նաև համալսարանին կցուցաբերեն խորհրդատվական աջակցություն:
«Որպես երկրում կարևոր տնտեսական դեր ունեցող ընկերություն և առաջատար գործատու` մեր կորպորատիվ պատասխանատվությունն է նաև կառուցել կամուրջներ կրթական հաստատության և աշխատանքային աշխարհի միջև»,- ասել է Orange Արմենիա ընկերության գլխավոր տնօրեն Բրունո Դյութուան:
Նախատեսվում է համալսարանում ստեղծել նաև անվճար Wi-Fi անկյուն, որի շնորհիվ բուհի ուսանողներն ու դասախոսները կկարողանան օգտվել Orange wi-fi ինտերնետից:
