«Պետեր Վիլշևսկին ուժեղ բռնցքամարտիկ էր, նրա դեմ մենամարտում ես շատ չարչարվեցի, բայց կարևորը կարողացա հաղթել: Այս հաղթանակի շնորհիվ էլ WBO վարկանիշում դարձա առաջին համարը»,- Երևանում մամուլի ասուլիսի ժամանակ հայտարարեց հայազգի բռնցքամարտիկ Արթուր Աբրահամը, որը վերջերս միավորներով հաղթել է լեհ Պետեր Վիլշևսկուն:
Լեհ մարզիկը նշել էր, որ Աբրահամը «կեղտոտ» հարվածներ է հասցրել, սակայն Աբրահամը կարծում է, որ բռնցքամարտում նման բաներ պատահում են: «Ինքն էլ ինձ է մի քանի չթույլատրված հարվածներ հասցրել, բայց ես այդ մասին չեմ բարձրաձայնել»:
Աբրահամն իր հաջորդ մենամարտը կանցկացնի օգոստոսի 25-ին Բեռլինում կամ Համբուրգում, և մրցակիցը կլինի Ռոբերտ Շտիգլից- Ջորջ Գրովս զույգի հաղթողը: Աբրահամը կարծում է, որ այդ մենամարտում, ամենային հավանականությամբ, հաղթանակ կտոնի Շտիգլիցը, և գերմանացի երկրպագուները կտեսնեն գեղեցիկ մենամարտ:
Վերջերս Շտիգլիցը հայտարարել էր, որ Աբրահամը այս քաշային կարգում այդքան էլ լավ տեսք չունի, ինչին ի պատասխան, հայ բռնցքամարտիկը նշեց. «Ես իրեն ռինգում կապացուցեմ, ու ինքը կհամոզվի, որ սխալ է կարծում:
Բացի այդ, ես փորձում եմ մարտավարությունս փոխել. տարածքից հարձակում գործել, քանի որ այս քաշային կարգում այդքան էլ լավ չի գործում պաշտպանական տակտիկան»: